【金寶湯又酸又宿 忌廉味臭到嘔食唔落】伏務台

童年回憶中,阿媽間唔中都會開罐金寶湯煮返個蘑菇湯飲,係幾好味嘅。但係估唔到金寶湯愈出愈多款之後,會出現超伏食物!

小編喺百佳見到金寶HOME STYLE香濃忌廉雞肉長通粉(HKD18.1)有晒料以為好開心啦,平過食茶記早餐,533g都等於一個7仔叮叮飯夠飽吖,點知原來踏上準備嘔吐之路!

一開聞吓都幾香,又多料,點知加熱就出事!佢傳出陣陣嘔吐物嘅酸!宿!臭!味!小編個心真係灰到爆廠,臭到嘔嘅味點解可以推出街?雖然雞肉嚡嚡哋、長通粉腍腍哋,係罐頭質素,但堅食唔落……試咗一啖要飲幾杯水沖走陣味!

放棄雞肉長通粉,轉陣開金寶蕃茄蜆肉(HKD11)加意粉煮,點知呢個係好酸嘅鐵鏽味……蕃茄嘅酸似茄醬冇落過糖咁,我算!蜆肉細到鼻屎咁,我算!但加埋一齊係鐵鏽味我點算?只能慶幸未將意粉加落去,唔係連意粉都浪費埋!

小編伏氣:結果小編將兩碗嘢放喺一角,由中午擺到收工,迫於無奈要洗返啲碗都仲聞到金寶HOME STYLE香濃忌廉雞肉長通粉散出微微嘅嘔吐味!今次完全破壞晒對金寶湯嘅印象,包裝靚咗高級咗,但質素冇跟住一齊提高。做唔到平靚正唔緊要,但至少都俾返個正常味道嚟好喎!

 

入伏點:百佳超級市場

中伏by #為食加菲貓
美術by #Mui Mui,大肚Dum
攝影by #為食加菲貓

《伏務台》星期一伏務大眾,歡迎各界報料。

You may also like...

Leave a Reply

Your email address will not be published. Required fields are marked *