【麵包舖惡鼠橫行片瘋傳 老闆:間唔中先一兩隻!】食焦

上星期邊條片喺網上瘋傳?一定係沙田間麵包舖變咗老鼠樂園咁,俾網民拍到有好多隻生猛老鼠凌晨時份喺舖頭亂咁走,畫面好驚嚇!話說係有網民喺年初五凌晨兩點幾,經過沙田瀝源邨嘅漢和麵包舖,喺玻璃門望入去,見到有好多隻老鼠走嚟走去,仲話起碼有30隻咁多添!

麵包舖變咗迪迪尼喎,咁多隻米奇亂咁走,睇見都打冷震呀!(沙田友fb專頁影片截圖)

網友拍低呢條成1分鐘嘅片,隔住個玻璃望,網友話有成30隻老鼠咁多囉!(沙田友fb專頁影片截圖)

條片po咗喺「沙田友」fb專頁之後即刻瘋傳,個個睇見都嘩嘩聲,而麵包舖老闆都即刻「做嘢」,好快親自留言致歉,仲po返之前啲滅蟲公司收據,證明舖頭有定期做滅蟲滅鼠工作!老闆仲做埋《東張西望》訪問添!

老闆陳生上埋《東張西望》添!(無綫電視畫面截圖)

小編都有打俾老闆,陳生就話呢幾日食環署日日都去舖頭巡查,「發生咗呢件事,我第一時間係即刻換咗間滅蟲公司,搵過第二間,同埋成個工場做大清!全個場嘅麵包要丟晒先啦!」老闆話以往一個月都做兩次滅蟲滅鼠,佢話點都估唔到會有咁多老鼠,「一定唔會有咁多,以往好間唔中耐唔時先有一、兩隻可能喺出面爬入嚟嘅!點會有咁多?」

出事麵包舖漢和,喺沙田瀝源邨。(網上圖片)

雖然有片有真相,不過老闆又話愈諗愈古怪喎!「你諗吓,我做咗十幾廿年,幾乎一年365日全年無休,咁啱得咁橋嗰幾日工場趕完工,就係嗰幾日真空期就發生呢件事。如果平時真係咁多老鼠,我仲點會咁樣……唔拉閘呀!無可能啦!」

老闆即刻喺網上回應耍晒冧,都算快手嘅!(沙田友fb專頁截圖)

老闆話雖然冇證冇據講乜都冇用,但佢話俾人專登整蠱放啲老鼠入嚟嘅機會唔係無㗎!「(同行做?)我唔敢講話邊個做,但我真係覺得成件事唔係咁簡單!我賣包一向低價啲,我又會派包俾啲老人家,其實試過有行家同我講,叫我啲價錢可唔可以高返啲!我話我唔係頂爛市,總之大家各有各做!」

出示埋麵包舖之前嘅滅蟲滅鼠收據!(沙田友fb專頁截圖)

老鼠片瘋傳後,老闆話門面生意跌咗七成,不過都仲有啲老街坊熟客話會支持佢!「好無奈、好傷心!依家只能夠做好自己!」

一場「鼠患」,陳生話跌咗7成生意,諗起都一殼眼淚喎!(無綫電視畫面截圖)

You may also like...

Leave a Reply

Your email address will not be published. Required fields are marked *