【爐頭生銹雪櫃臭晒 前員工控訴灣仔扒房】食焦

又有員工爆料喇,不過今次係前員工!上個星期,喺飲食群組「中伏飲食報料區」度,有網友自稱曾經喺灣仔克街一間西餐廳做過,因為睇唔過眼餐廳廚房嘅衛生同食物安全,一於將真實情況,影晒相po埋上網,打足成段字po咗9張相出嚟(不過原po之後刪咗嘅!)。

上星期有網友喺飲食群組出po,話「睇唔過眼」之前打工間西餐廳嘅衛生情況,臨尾仲寫埋餐廳名!不過喺事件上報之後,就刪咗個po!(中伏飲食報料區群組截圖)

事主聲稱曾經喺灣仔克街一間西餐廳工作,而佢喺po度寫低嗰間扒房餐廳Carlo Riva亦係喺克街,令人好大聯想喎!(網上圖片)

呢位前員工有圖有字,數足餐廳九宗罪咁多㗎!有乜呢?包括話餐廳俾客人飲嘅係水喉水啦、熱水得95度冇殺菌啦、冰櫃半年都唔洗一次、過期食物同其他食物放埋一齊、個雪櫃臭晒無人理、發晒霉都無人理、爐頭生晒銹等等……

話廚房個抽真空機壞咗都冇人理!(中伏飲食報料區群組圖片)

生晒銹嘅爐頭。(中伏飲食報料區群組圖片)

喺個po嘅文尾仲寫埋(冇tag到!)灣仔Carlo Riva呢幾隻字,咁呢間食扒嘅西餐廳Carlo Riva又係喺克街,咁好難唔令人聯埋一齊諗囉!有相又有名,自然上埋報,餐廳負責人回應傳媒嗰時,就無否認到啲相,只係話相信係一名前「炒散」員工同公司不歡而散,可能玩報復放上網喎!

話係一隻變壞咗嘅龍蝦,就咁同其他食物放埋一齊!(中伏飲食報料區群組圖片)

唔包保鮮紙嘅餸。(中伏飲食報料區群組圖片)

已經發臭嘅肉?(中伏飲食報料區群組圖片)

網友反應又點?分咗兩派,有人話冇諗過真係咁唔衛生,「未見過咁惡劣嘅衛生環境」、有人又話其實好多餐廳嘅廚房都係咁,大家「眼唔見為乾淨啦」!不過更令網友好奇嘅係,之前原po樓主仲話會有料爆,點解最後刪埋po兼潛晒水?冇料再爆,搞到網友冇得再剝花生呀!

餐廳負責人回應傳媒就話相信係一名前「炒散」員工同公司不歡而散,可能玩報復放上網喎!(中伏飲食報料區群組截圖)

「眼不見為乾淨」,咁見咗仲敢唔敢去食呢?(中伏飲食報料區群組截圖)

有網友就覺得存疑喇!(中伏飲食報料區群組截圖)

您也許也會喜歡…

發表迴響

你的電子郵件位址並不會被公開。 必要欄位標記為 *