【玫瑰花味蜂蜜似番梘水 櫻花蝦汽水變蝦條浸水】伏務台

呢期櫻花蝦同埋各種花味副製品咁鬼hit,好多食物都出咗櫻花蝦味、乜乜花味等等,有伏有唔伏。最近小編喺AEON百貨嘅超市入面見到呢支櫻花蝦有汽飲品(HKD15.9)同埋屈臣氏出嘅玫瑰花味蜂蜜水(HKD7)睇個名覺得伏味幾濃,一於買嚟試吓佢咩料先!

屈臣氏蒸鎦水就得多,蜂蜜玫瑰水你又試過未呢?見到呢個粉紅色包裝,開頭仲以為係節日限定版嘅普通蒸鎦水,睇真啲原來係新口味喎。粉紅色花花嘅包裝少女心爆棚,一打開就聞到濃郁嘅花香味,但味道有少少似……花露水?聞落唔臭嘅,不過有啲cheap cheap香精味咁,一分錢一分貨,飲落口試吓先。

嘩嘩嘩嘩嘩,飲落口依然有濃濃嘅花味,不過就好似飲咗番梘水落肚咁。可能因為陣花味太濃,味道令人唔係幾舒服。飲完覺得可以個口度吹個泡泡出嚟咁,好膠。

試完花露水,唔係,係玫瑰蜂蜜水之後,係時候試吓櫻花蝦味汽水喇,佢聲稱呢支嘢含日本駿河灣櫻花蝦成份。見到佢個包裝都正正常,又係日本嘢,應該唔會伏得去邊啩?不過2秒之後打開咗樽蓋嘅我,簡直覺得2秒前嘅我太天真!邊個話日本嘢冇伏嘢?

一打開個蓋就知今次真係打,大,佬,喇!佢擁有一陣唔應該屬於飲品嘅味道,鹹鹹嘅海水味再帶點蝦嘅「鮮味」(其實有啲腥)。唔買都買咗返嚟,小編有買下來豁出去,合埋眼掩住個鼻用心品嘗喇……

唉……飲完之後除咗個伏字都唔知講咩好。頭先個蜂蜜水都可能有愛花之人或者覺得OK,但呢支櫻花蝦汽水就……我只能話好似攞咗啲蝦條/餅去浸水、入樽再加二氧化碳咁囉!

 

小編伏氣:櫻花蝦味汽水絕對可以稱得上係有汽飲品界中嘅伏中之王喇!小編更加為咗可以同同事些牙,離口飲呢支嘢,於是滴到成件衫都係,依家放咗工都仲係成身蝦(腥)味……

 

櫻花蝦味汽水
入伏點:AEON
入伏價:HKD15.9

屈臣氏蜂蜜水(玫瑰味)
入伏點:7-Eleven
入伏價:HKD7

中伏by #肥仔文
美術by #mui mui
攝影by #Manha

《伏務台》星期一伏務大眾,歡迎各界報料。

 

 

您也許也會喜歡…

發表迴響

你的電子郵件位址並不會被公開。 必要欄位標記為 *