【高質潮州自助餐推介 歎住海景食惹味滷水鵝】港島太平洋酒店

食自助餐成日都食西式嘢好悶?西營盤嘅港島太平洋酒店就推出潮州菜自助餐,等大家轉吓口味。
今次自助餐以傳統潮州菜為主,有凍蟹、滷水鵝片、滷水墨魚、大眼雞等廿多款潮州菜。前菜推薦大家花雕水晶龍蝦鵝肝凍,呢個冷盤打開味蕾同胃口!果凍充滿花雕酒香,凍食鵝肝唔會太腥,龍蝦都幾彈牙。

滷水汁食得出用咗好多香料熬製,唔會過鹹,師傅過濾咗好多次,所以無雜質。滷水鵝掌嘅皮吸晒滷水汁精髓,滷水鵝肉滷到好腍添!滷水大腸滷水墨魚就幾爽口。滷水腩肉肉脂比例平均,食落唔肥,皮都幾脆身,有驚喜!

滷水和牛臉頰算係fusion菜,用咗澳洲M5和牛臉頰,肉質軟腍,入口即溶,估唔到配滷水汁都幾夾。

潮州蠔餅炸至金黃色,好酥脆!一般自助餐嘅炸物,放出嚟一段時間好快就腍,但呢個依然香脆。

其他菜式仲有胡椒鹹菜豬肚湯蠔仔粥鱈場蟹腳波士頓龍蝦青口等等。食材新鮮,性價比高。

甜品幾特別,以茶入饌,有潮州單欉水仙朱古力蛋糕鐵觀音奶凍,有淡淡茶香,唔會超甜。但mui mui最喜鍾意就係養生豆花,自家製,豆味勁濃,比坊間嘅更滑更軟,誇張到唔落糖都好好味!

逢星期六晚仲有茶藝高手即沖潮汕功夫茶,鍾意歎茶嘅朋友要留意喇。

 

「潮」飲「潮」食主題自助晚餐
供應日期:即日至2018年3月31日 
供應時間:18:15-21:30
星期日至四:
成人:HKD398;小童及長者:HKD278,設加一收費
星期五、六、公眾假期及其前夕:
成人:HKD438;小童及長者:HKD318,設加一收費

 

港島太平洋酒店 – 中西∙環Centre Street Kitchen
地址:香港西營盤干諾道西 152 號
電話:2131 5908
營業時間:星期一至日:06:45-21:30

您也許也會喜歡…

發表迴響

你的電子郵件位址並不會被公開。 必要欄位標記為 *