【彩虹邨平價名店 6蚊兩串炭燒雞肉】平霸

今期平霸搵食,小編嚟到彩虹邨好出名嘅名店楓林軒。食物有超多款式選擇,價錢又親民,放學時段簡直係學生哥天堂,平到唔使睇價錢都可以直接叫呀,唔做平霸都唔得啦!

今次小編叫咗個全雞宴,加埋飲品30蚊都唔使,超抵食喎!即睇小編食後感!

麥樂雞(HKD5)5蚊有4件麥樂雞,其實食落我覺得同麥記嗰啲係冇分別嘅,想食麥樂雞,唔使去麥記喇,楓林軒幫到你。買10蚊就已經有8件,絕對夠食呀!

吉列雞扒(HKD5)炸粉同雞肉嘅分量係一比一,食落冇乜味,但5蚊咁平都算收貨嘅!小編都係推介麥樂雞多啲啊!

雞鎚(HKD6)食落就乾身咗啲喇,不過相對嚟講冇咁油,雖然冇乜肉汁,純粹過吓口癮都唔錯㗎!

炭燒雞肉串(HKD6)絕對有驚喜呀!好明顯食得出真係有燒烤味,而且啲醬汁好濃味,雞肉都夠滑,堅好食喎!

椰果豆漿(HKD7)飲落唔會話偏甜,不過神奇地覺得自己飲到啲荔枝味,椰果分量都算多,豆漿味會慢慢滲返出嚟,又ok喎!

平霸小評:平霸搵食大成功!楓林軒除咗雞之外,其實仲有唔少小食揀㗎,好似丸類、麵類乜都有,糧尾又有咩好怕喎!

楓林軒
地址:彩虹彩虹邨商場 4 號地下
營業時間:星期一至六:06:00-20:30(星期日休息)

《平霸》平食四方,歡迎各界報料。

您也許也會喜歡…

發表迴響

你的電子郵件位址並不會被公開。 必要欄位標記為 *