【叮叮飯高脂高熱量 公開便利店有營食法】懶健康貼士

香港人生活咁忙又貪方便,好多時就咁幫襯便利店當醫肚,食物營養價值非常低,仲熱量驚人呀!燒賣、魚蛋(5-6粒)嘅熱量等同大半碗飯,加上成分以油同麵粉為主,零營養仲只會滯唔會飽。想食?唔緊要,都要記住有「營」建議先得呀!

網上圖片

麵包、蛋糕
好多人會揀麵包、蛋糕類當早餐,普遍200-300千卡,而厚燒香軟蛋糕則接近400千卡;另外蛋糕類普遍糖分較高,比三文治高出2-8倍。所以便利店早餐嘅有營首選係三文治類好喇, 所含碳水化合物同蛋白質,既有營養又飽肚,例如一份煙火腿生菜三文治,熱量就僅得159千卡。

有營建議
三文治 + 低脂牛奶或無糖、低糖豆漿。

網上圖片

叮叮飯盒
叮叮飯盒當中有冇大量防腐劑或色素?建議大家留意營養標籤。雖然冇標明分量,但一般係由分量最多排到最少,如果成份排喺較前位置,就要小心。 其實叮叮飯盒多含高熱量高脂醬汁,鈉含量亦高,好似日本咖喱豬扒飯內含1005 毫克鈉質、肉醬意粉含838毫克鈉質,已接近超過一半世衛建議每日上限的2,000毫克指引,食得多易增高血壓及心血管病風險。

有營建議
每日應至少進食一碗半分量嘅蔬菜,但叮飯嘅蔬菜有限,建議大家喺選擇叮飯嗰陣,考慮多買一包即叮即食菜補鑊。叮叮蒸氣烹調能夠鎖住菜蔬原有天然鮮味,唔使油鹽或人工調味都令餸菜美味可口,同煎炒及水煮比較,更可保留多50%維他命C,鎖住天然味道與營養, 減少食材氧化。蔬菜熱量較低,適宜減肥期間食用。

網上圖片

即食麵
無論係公仔麵或辛辣麵等,都經過油炸,一個杯麵就含有4茶匙油,如果再加入調味包,更會增加脂肪含量。一碗杯麵普遍含有400-500千卡,一星期食一次,兩個月就重1.5磅。經常進食,也會增加膽固醇。 調味油包仲多含有反式脂肪,重口味嘅杯麵鈉含量更加驚人,食得多容易水腫, 對身體造成不少負擔㗎!

有營建議
可以揀非油炸嘅粉絲或米粉代替。

網上圖片

飲品
香港天氣通常非常熱,流咗一身大汗之後,唔少人會選擇飲返啲運動能量飲品,事實上係非常高糖嘅飲品。據食物安全中心資料,一支500毫升能量飲品,約有50克糖同200千卡。大部分飲品一樽已等於或超過世衛建議嘅成年人糖分攝取量嘅一半。 糖分太高不單止令身體難以吸收水分,容易引致脫水,更可能令腸胃不適。

有營建議
可以選擇無添加糖茶類飲品(如綠茶、烏龍茶、玄米茶等)同水。

 

Michelle Lau

營養諮詢公司NUTRILICIOUS創辦人及首席營養師(加拿大人類營養學碩士)。專注範疇包括運動營養學、體重管理、兒童和婦女營養學。致力推廣均衡營養飲食概念,為多間機構提供營養飲食服務及為顧客提供度身訂造的飲食計劃 。作為一個熱愛跑步和烹飪者,她深信 “Life is so endlessly delicious.”

Follow her on ig/fb@nutriliciousss

You may also like...

Leave a Reply

Your email address will not be published. Required fields are marked *