【LANEIGE期間限定Café 食金箔梳乎厘做善事】LANEIGE Sparkling Café

繼上年Chanel喺香港開過Pop-up Café之後,今年輪到韓妝品牌LANEIGE喺朗豪坊開喇!美容聯乘美食,一樣有好多嘢玩得出!今次LANEIGE Sparkling Café除咗為宣傳品牌限量版嘅BBCushion霜同睡眠面膜之外,仲係一個慈善活動!LANEIGE會將全數收益捐去願望成真基金(Make-A-WishHongKong),而基金會用在重病嘅小朋友身上。可以做善事之餘又有得食甜品,正呀!即刻睇吓小編食後感啦!

限量版戀戀春日水感亮白BBCushion霜

水光亮白維C睡眠面膜

首先介紹嘅當然係皇牌金箔黃金Sparkling梳乎厘班戟(HKD35),金光閃閃嘅梳乎厘再配白色士多啤梨,呃Like啱晒!不過影相要快手啲,趁脹卜卜嘅梳乎厘班戟未冷卻Drop down之前好影喇 !小編都要分秒必爭影完相即刻食落肚!班戟食落略嫌有少少唔夠「梳乎厘」嘅感覺,唔係嗰種一陣風嘅「空氣」班戟,不過咬落口都有啲份量,唔會食完好似冇食咁。

另外仲有呢個閨蜜小熊梳乎厘班戟(HKD35),外表真係成功擊破小編嘅少女心呀,兩隻藍色小熊坐喺天空藍色嘅「雪山」上面,超可愛呀!真係要幫佢瘋狂影相先得!

其實要喺3款梳乎厘當中揀一款真係會觸發選擇困難症㗎,事關仲有呢款粉紅雲朶梳乎厘班戟(HKD35),白色嘅棉花糖鋪喺班戟上面,好夢幻呀!不過上面嘅棉花糖出爐冇耐就縮埋一嚿,都係嗰句啦,影,相,要,快!

除咗梳乎厘班戟,仲有兩款甜睡小熊水滴菓子(HKD35)俾大家選擇。呢款菓子有啲似之前日本大熱嘅水玄餅咁,望落晶瑩食落口亦相當清新。菓子本人就冇咩味嘅,不過配埋旁邊點綴嘅荔枝味珠珠就變成清爽口味嘅甜品喇!

食完Pancake之後應該都同閏蜜影咗好多相喇,唔好走住!因為仲有「即影即晒」服務俾你玩吓,大家用手機影完相可以行過去「小熊窗口」嘅位置,就有專人幫你打印相片,超貼心!

提提大家,買每款甜品嘅時候都會得到一張價值35蚊嘅LANEIGE Coupon,又有甜品食又可以「全數回贈」,夠著數呀!呢個Pop-up Café快閃9日咋,快啲約埋閨蜜去打卡啦!

 

LANEIGE Sparkling Café
日期:2018年3月16日至3月24日
地點:旺角朗豪坊4樓通天廣場
開放時間:11:00-23:00(甜品供應由中午12時起)

You may also like...

Leave a Reply

Your email address will not be published. Required fields are marked *