【台北米芝蓮冇乜台味 港客熱門燒肉店攞星】食焦

頭炮台北版《米芝蓮指南》今年新鮮熱辣首頒,話晒係米芝蓮喎,梗係每間餐廳都想攞星啦,之前已經率先公佈咗《必比登推介》,有唔少星級牛肉麵同夜市食物都有入圍,輪到上星期三頒重頭戲,公佈結果之後,有賽前熱門好似法國餐廳L’Atelier de Joël Robuchon只得一星、鼎泰豐只得推介直頭冇星!奪得三星嘅就得一間獨贏,就係台北君品酒店嘅粵菜餐廳頤宮。

上星期三台北版《米芝蓮指南》公佈結果,得獎餐廳嘅主廚齊齊大合照。(台北米芝蓮fb專頁圖片)

至於最受港客歡迎,幾乎成間店坐滿遊客嘅燒肉店「大腕」,就成為17間入圍米芝蓮一星嘅其中一間喇!有唔少港人遊台,講到食燒肉除咗乾杯同胡同之外,好多人都會推介「大腕」,雖然價錢相對比乾杯同胡同高價啦,但比起喺香港食就叫做抵食添喇!

「大腕」嘅和牛板腱,睇見都想食呀!(大腕燒肉專門店fb圖片)

專人燒埋唔使煩!(大腕燒肉專門店fb圖片)

其實耐唔時就有網友喺討論區大推「大腕」,有人話次次飛親台灣都要食佢,雖然少少貴但真係食過翻尋味,不過就預咗會撞到唔少港客囉!喺「大腕」食燒肉有專人燒埋俾你,一份霜降牛五花賣港銀80蚊左右,抵啦!想食豪啲更加可以點澳洲和牛同日本和牛,和牛橫膈膜百零蚊一份,到千幾蚊一件牛小排都有,睇你點揀!

「大腕」一直都係唔少港客去台灣嘅必食燒肉之選。(大腕燒肉專門店fb圖片)

網友都話見到勁多港人!(香港討論區截圖)

睇返今次個得獎名單,其實有唔少港人功勞㗎喎!好似三星嘅頤宮就係由港人、人稱強哥嘅做主廚,招牌菜係火焰片皮鴨;又好似攞咗一星嘅歐洲菜餐廳MUME,老闆兼主廚亦係香港人喇!二十間入圍餐廳,得兩間食台菜咋,就係老字號「金蓬萊遵古台菜」同「明福台菜海產」,真係物以罕為貴喎!

台菜老店「明福台菜海產」得一星。(明福台菜海產fb圖片)

 

台北米芝蓮2018 星級餐廳入圍完整名單 https://goo.gl/9QoSBU

You may also like...

Leave a Reply

Your email address will not be published. Required fields are marked *