【網民留言鬧錯係「三哥」 譚仔神回化解公關災難】食焦

鬧人都要揀啱對象先得㗎,唔係就盞自己攞嚟衰,鬧人反被其他網友圍剿就唔好啦!好似最近有位網友喺譚仔雲南米線個專頁度留言,猛咁投訴譚仔服務差,「比(俾)少少錢呢,就好似欠咗佢咁!」仲話譚仔再唔做返好啲服務態度,做幾好嘅宣傳都係多餘咁話!

面對網友嘅瘋狂鬧言,譚仔嘅小編都話「沒氣說了」!(譚仔雲南米線fb專頁截圖)

貼埋圖出嚟話係三哥,咁真係冇得兜喎!(譚仔雲南米線fb專頁截圖)

由於呢位網友喺唔同嘅po度都留言投訴,但係留意返,佢其實想投訴嘅係「譚仔三哥」,而唔係「譚仔雲南米線」,當譚仔回覆返佢,「土瓜灣我哋冇分店」,同埋「我哋唔係呀『乜哥』」,呢位網友都一樣死心不息,仲話返「你哋都係譚仔,我唔理得你咁多……」

譚仔小編又再運用「重要的事說三次」,再一次強調「我哋唔係阿乜哥呀」!(譚仔雲南米線fb專頁截圖)

死撐嘅金句通常係「唔理得你咁多」!(譚仔雲南米線fb專頁截圖)

面對呢位鬧錯人嘅網民,譚仔嘅回覆好彩都挽回其他網民嘅like,唔少人都話處理得好喎,至於鬧錯人嗰位,就梗係俾人鬧爆返轉頭啦,有人話睇一次就笑一次,仲話下次想投訴大家樂唔好食,不如去大快活投訴,個個網友都一面倒話佢鬧錯人仲好意思死撐囉!其實譚仔同三哥反正都先後俾「丸龜製麵」收購咗,去「丸龜」度投訴唔知又點呢?

認住喇,呢間譚仔係冇三哥㗎!(譚仔雲南米線fb專頁圖片)

連鎖反應,網友即刻舉一反三!正喎!(中伏飲食報料區專頁截圖)

真三哥躺著也中槍喎!(中伏飲食報料區專頁截圖)

講到話鬧人反被人圍攻呢回事,喺網上世界成日發生,近排都有唔少例子!除咗話譚仔變三哥俾人笑之外,另外有位網友po咗炮台山一間茶記喺餐廳內張貼嘅通告,寫住「自取紙巾,每張十元」,結果有唔少人係撐返間茶記,仲話「你估紙巾唔使錢」、同埋遇正有網友係熟客仔,即刻話曾經試過叫侍應俾紙巾,係唔使收錢都會俾,只係餐廳唔想人浪費紙巾任咁搣,先會話要自取十蚊啫!都係嗰句啦,識睇梗係睇留言喇!

原po嘅網友係想話一張紙巾都要十蚊係咪好過去搶呢種說法嘅,不過似乎其他網友唔係咁睇喇!(網上圖片)

又有另一單係,原po嘅網友想叫素食者唔好去肯德基食蘑菇飯,因為個汁其實係有肉,仲po埋肯德基嘅回應出嚟添!結果,好多網友鬧返轉頭,話食素做乜要去肯德基?(網上圖片)

You may also like...

Leave a Reply

Your email address will not be published. Required fields are marked *