【盤點3間特色茶店  吸客絕招賣點大不同】春風三月、Flamingo Bloom、了不起

珍珠奶茶幾乎成為咗大家嘅「必需品」咁喎,開心要飲,唔開心都要飲;夏天解渴要飲,冬天保暖都要飲!不過珍珠奶茶店愈開愈多,開到好似便利店咁「梗有一間喺左近」之後,間間差唔多冇咩特別咁。今次小編就同大家精選近來三間唔同特色嘅茶飲店,睇吓有冇你心水?

元朗小店 自家製珍珠

喺元朗千色店地下嘅春風三月有別於普通賣台式珍珠奶茶嘅小店,佢哋嘅珍珠唔係由台灣進口,而係用台灣嘅原材料做成嘅「手工珍珠」。人手製珍珠所用嘅人力物力都比較高,不過老闆娘之一嘅方小姐就話希望顧客可以有多啲選擇,同埋飲到有信心保證嘅珍珠奶茶。唔講唔知,原來春風三月呢個名係來自一首唐詩《茶山貢焙歌》,「使君愛客情無已,客在金台價無比。春風三月貢茶時。」呢首詩仲印咗喺舖頭內壁上,飲珍珠奶茶都咁有詩意,好文藝呀!

自家製珍珠有幾款,除咗最Original嘅黑糖口味之外,小編認為焦糖Baileys口味珍珠就最特別喇,全港應該只有呢度食得到!老闆娘話挑選合適嘅酒類製作珍珠時都試過好多種,結果發現焦糖味Baileys製成珍珠後可以保留到焦糖嘅香味,食落冇乜酒味,大人細路都啱食!另外桂花珍珠同玫瑰珍珠亦係舖頭嘅招牌之一,小編今次試咗鐵觀音玫瑰珍珠(HKD30),珍珠咬落口好QQ,而且玫瑰味好濃!鍾意花香味嘅朋友記得試試喇!

如果夜晚想飲返杯嘢但又驚飲茶會瞓唔著嘅話,可以試吓呢款嫩仙草奶凍(HKD28)或者Double芋頭奶(HK36)!呢兩款飲品都係不含任何茶或咖啡因成分嘅,而且仙草入口超幼滑,仲滑過小編隻手仔呀!大人細路都啱飲。

春風三月
地址:元朗教育路1號元朗千色匯地下G34號舖
電話:6060 4907
營業時間:星期一至日:11:00-22:00

 

中環潮店 健康果茶OL最愛

中環石板街旁嘅呢間茶店用咗搶眼醒目嘅Flamingo做吉祥物,成個舖頭設計都好有熱帶風情呀!直頭有一種鬧市中綠洲嘅感覺,店主亦希望客人入到嚟可以暫時放下工作,好好歎返杯茶。佢哋分別主打茉莉毛尖綠茶、高山油入烏龍、四川蝶蘭紅茶同埋胎菊普洱黑茶,飲品款式多數搭配新鮮水果,夠晒健康呀!小編問過負責人,佢話因為老闆本身唔鍾意飲咖啡,而返工需要提神嘅時候就會選擇飲茶,因為茶同咖啡一樣都有咖啡因,不過比咖啡更加健康同埋容易入口。老闆亦知道好多女士都未必鍾意飲咖啡,所以就開咗呢間Flamingo Bloom,希望大家可以多一個健康新選擇。

近年興健康飲食,Flamingo Bloom都堅持用新鮮水果和蔗糖代替傳統糖漿,仲會不定期更新Menu,可以係唔同季節飲到最好味嘅水果茶;而茶葉方面亦嚴選唔同產地嘅茶葉,並用原片沖泡,茶底夠濃夠甘香!由於2-3月係士多啤梨當造期,所以佢哋就推介咗呢杯草莓茉莉珍珠綠茶(HKD44)俾小編。望落好粉紅好少女心呀!飲落口既有士多啤梨嘅酸甜果香又有淡淡茉莉花嘅香味,飲落唔會好Heavy,如果你同小編一樣怕肥就啱晒喇!

如果Tea Time想飲得滿足少少嘅話,亦可以試吓呢杯奶蓋玫瑰烏龍(HKD36)。奶蓋上層放原粒玫瑰真係好賞心悅目,奶蓋同帶有淡淡玫瑰香嘅烏龍茶好夾,呢杯小編畀5粒星呀!雖然奶蓋係有少少肥,但吃貨係應該所向無懼㗎哈哈!另外Flamingo Bloom亦有提供無糖無咖啡因嘅Nacked Zero系列,呢個系列sell嘅係純果汁,甜味只靠杏仁奶同烏魯木齊提子,連大肚婆都啱飲!

Flamingo Bloom(中環店)
地址:中環士丹利街50號信誠廣場地下B號舖
電話:5177 8255
營業時間:星期一至六:11:00 – 21:00;星期日:11:00 – 20:00

 

台灣過江龍 茶葉最靚

西環嘅了不起係台灣嘅名牌珍珠奶茶店,作為過江龍嘅佢第一站選擇喺香港大學站附近落腳,認真夠薑呀!其他過江龍多數會選擇喺旺區打頭炮,而呢間舖嘅位置唔算近地鐵站,不過當負責人就表示完全唔怕!因為佢哋係用品質取勝,希望以用心挑選、製作嘅茶去吸引客人!

身為台灣珍珠奶茶名店,了不起嘅招牌飲品除咗珍珠烏龍拿鐵之外,佢嘅冷泡茶系列亦十分出名,就係了不起冷泡茶(紅茶)、三燻翡翠冷泡茶同炭焙烏龍冷泡茶(HKD28)。其實最「平凡」嘅茶飲先係最考工夫嘅,了不起製作的冷泡茶需經過8小時的濾滴過程,溫度更要一直維持在4°C,相當考功夫。店長特別推介三燻翡翠冷泡茶和炭焙烏龍冷泡茶俾小編,三燻翡翠冷泡茶嘅茶葉分別用咗越南同台灣進口嘅原片茶葉,再以茱莉花層壓而成,茶香與花香並重,口感相當甘醇,夏天解渴就啱晒喇!而鍾意飲市面樽裝烏龍茶嘅朋友亦可以試吓佢哋嘅炭焙烏龍冷泡茶,茶葉由台灣黃金烏龍、炭焙烏龍以及阿里山鐵觀音三款混合搓揉而成,口感甘而不澀,解膩之餘唔會飲到「口寡寡」。

去過台灣旅行嘅朋友都知道芭樂幾乎可以譽為寶島嘅「國民生果」,好多夜市都可以買到已經切好一份份嘅芭樂,酸酸甜甜非常開胃,喺台灣炎熱嘅夏天食返嚿就啱晒喇!不過芭樂喺香港就唔係咁流行,為咗將「芭樂熱」燒到嚟香港,店長亦都強力推介呢款芭樂檸檬(HKD38)俾小編。啖啖纖維嘅感覺真係冇得彈,平時少食生果嘅小編完全被佢征服!飲落口仲有芭樂粒,口感質次豐富。

 

了不起(香港大學店)
地址:西環皇后大道西455號龍暉花園地下1號舖
電話:3462 2828
營業時間:星期一至日:11:00-23:00

您也許也會喜歡…

發表迴響

你的電子郵件位址並不會被公開。 必要欄位標記為 *