【清腸消暑抗氧化 自製有營蕃茄凍湯】懶健康貼士

踏入四月天,溫度逐步上升,想清腸、消暑同提升免疫力,又想均衡攝取蛋白質同澱粉、纖維質?最好梗係飲返碗營養凍菜湯啦!西方營養學證實,蕃茄、洋蔥同青瓜均有抗氧化功能,搭配不同食材,日日飲返碗自然可以對抗炎夏,凍菜湯易整又好飲,快啲學吓啦!

蕃茄——所含營養素好多,尤其係茄紅素、維他命C、鉀同鎂。維他命C幫助加速傷口癒合同增強免疫功能,仲可以加強身體抵抗力添;茄紅素同樣有抗氧化成分,可以抗衰老之餘亦能預防心血管疾病。除了蕃茄外,紅蘿蔔、紅椒同西瓜等紅色蔬果亦包含茄紅素。

整凍湯平時可以用一般傳統的榨汁機,但我通常會用慢磨榨汁機, 因為慢磨榨汁機喺榨汁過程中,唔會產生熱力,能減少氧化,令蔬果保持營養成分。另外, 西班牙傳統做法都會加一塊仔隔夜麵包,等質地更加濃稠同有飽足感添!

 

有營蕃茄凍湯

材料  (四人份):
青瓜 (去皮去籽) 1條
甜椒 (去莖去籽) 1/2個
成熟蕃茄(去皮切塊) 1 1/2 磅
洋蔥(切碎) ½ 個
大蒜 (磨成泥) 1 瓣
紅酒醋(嗜酸者可再增加) 2 湯匙
海鹽 少許
橄欖油 3 湯匙

1. 先將青瓜、紅椒、洋蔥洗淨切塊備用。將剩餘嘅青瓜、紅椒大致切碎後,加入蕃茄、洋蔥、大蒜、2 湯匙醋、少許海鹽,喺室溫待半小時等味道融合。

2. 將蕃茄混合物連同殘留嘅果汁全部倒入果汁機,加入三大匙橄欖油以中速攪打至漿狀,以鹽、黑胡椒和醋調味。用粗濾網過濾至大碗中,冷藏至冰涼為止(約需一小時)。

3. 擺上櫻桃蕃茄、香草同小青瓜等配料裝飾,淋上少許橄欖油,撒啲鹽添味,可搭配麵包一齊食。

 

小貼士

  • 凍湯擺放隔夜滋味更飽滿,因此提前一日做好都得。
  • 可以用食物調理機(Food Processor)直接打生食材,但榨汁機多數要有啲液體先可以打勻。

 

Michelle Lau

營養諮詢公司NUTRILICIOUS創辦人及首席營養師(加拿大人類營養學碩士)。專注範疇包括運動營養學、體重管理、兒童和婦女營養學。致力推廣均衡營養飲食概念,為多間機構提供營養飲食服務及為顧客提供度身訂造的飲食計劃 。作為一個熱愛跑步和烹飪者,她深信 “Life is so endlessly delicious.”

Follow her on ig/fb@nutriliciousss

You may also like...

Leave a Reply

Your email address will not be published. Required fields are marked *