【撳錯掣出事 網友叫外賣pizza「走海鮮」】食焦

叫外賣有時候真係要打醒十三分精神,一唔小心噏錯揀錯都會隨時瀨嘢㗎!最近就有兩單外賣意外事件發生,真係唔知好嬲定好笑喇!首先係有連登仔話自己外賣叫千島海鮮pizza嗰陣,唔小心撳錯掣,一click揀咗「走海鮮」(有呢個俾你揀已經夠好笑啦!),仲要係送咗出舖先發現喎,想打返個電話改都遲晒喇!

走咗海鮮,都仲有啲青紅椒同芝士絲㗎喎!(連登圖片)

千島海鮮pizza走海鮮,盛惠116蚊!網友話百幾蚊食個餅底好唔抵囉!(連登圖片)

結果當然係一個走咗海鮮嘅pizza送到,116蚊當食個素pizza囉!網友見到呢個po梗係笑爆啦,原来樓主係喺pizza box度叫嘅,有網友就話如果喺pizza hut叫,係會再打返電話覆實喎,但係pizza box就冇喇!最好笑嘅提議就係叫樓主即刻叫返個海鮮pizza「走pizza」,咁咪可以食返個海鮮料囉!聽落又啱喎!

想改都改唔到!(連登截圖)

價錢係重點!(連登截圖)

可以當二合一新食法喎!(連登截圖)

其實自己手民之誤就冇得怪人啦,惟有下次醒目啲啦,咁唔關自己事,係人哋落錯單又點計呢?除咗連登仔撳錯掣「走海鮮」之外,都有另一位網友外賣出事,今次輪到係麥記,叫包唔係叫pizza!事緣係有網友去咗屯門一間麥當勞外賣叫咗個板燒雞腿漢堡包,點知店員落錯單,將「走醬汁」變咗「不要板燒雞腿」。

沙律菜包,真係好素吓!(李聲揚-華麗后台fb專頁圖片)

有圖有真相,如圖所見就係得兩塊麵包夾住幾塊沙律菜,消失的板燒雞腿真係走咗啦!好彩嘅係,網友喺拎返屋企之前打開望吓,及時發現咗,最後都換得返咋!唔係就咁食兩塊麵包就真係唔抵喇,重點係,今次錯不在自己,咁樣冇咗塊雞腿,係更加唔抵嘛!

麥記外賣真係要記得打開嚟check吓。(李聲揚-華麗后台fb專頁圖片)

You may also like...

Leave a Reply

Your email address will not be published. Required fields are marked *