【游水蟹「掉包」貨不對辦 食客轟酒樓:欺騙手法】食焦

去酒樓食海鮮即揀即叫即蒸就食得,但係有冇諗過上枱食嗰件唔係你揀嗰件呢?最近有網友就呻爆食阿拉斯加蟹發生貨不對辦情況,覺得俾酒樓呃咗,話「新鮮蟹放返缸,出隻唔新鮮俾我……存在欺騙手法……」話說呢位苦主係去咗竹園嗰間明星海鮮食晚飯,即場揀咗隻游水生猛阿拉斯加蟹,諗住原隻清蒸,網友話「保障自己,我整斷咗隻阿拉斯加蟹腳……」

呢位苦主就一口咬定係酒樓嘅欺騙手法喇,大家又點睇呢?(網上圖片)

以為咁樣就好安全唔會俾酒樓「掉包」?結果上枱嗰隻蟹,據網友所講係隻完整無缺,冇斷到腳嘅蟹喎!再據網友答返其他人嘅疑問,係佢有當場出聲嘈過,但樓面就同佢講係搞錯咗!「仲要話師傅搞錯,俾咗其他人食咗我嗰隻……跟住我睇返個缸,我嗰隻仲喺度游緊……」

上咗枱嘅清蒸阿拉斯加蟹,據網友所講並唔係佢揀嗰隻!(網上圖片)

網友整斷咗隻游水蟹腳,事後發現仲喺個缸度,冇煮到出嚟!(網上圖片)

睇返網友po出嚟嘅單,呢隻清蒸阿拉斯加蟹,寫明係原隻清蒸3斤半,要成980蚊,俾人咁樣換咗隻唔係自己揀嘅蟹,斷估隻蟹唔會臨時生返隻腳啩?唔止咁喎,有人仲好心水清,話睇呢隻蟹嘅樣只係隻油蟹,並唔係阿拉斯加蟹添!

另有網友指出,呢隻係油蟹,唔係阿拉斯加蟹喎!(網上圖片)

唔會間間都係咁啩?(網上截圖)

呢單嘢喺網上曝光之後,有傳媒都打過去呢間明星海鮮度問,酒樓經理就話事主當場投訴之後,已經提出話將「斷腳蟹」再煮過出嚟,但食客就拒絕喎!小編都有打去問多次位經理,佢就話公司處理緊(仲要處理乜?),唔係咁方便再多講喎!只係話的確係有提出再換多次俾食客!

事主話有當場出聲嘈嘅,得到嘅回覆係「師傅搞錯!」(網上截圖)

事主話等咗成粒鐘,乜心情都冇晒喎!(網上截圖)

取消order係似樣啲喎!(網上截圖)

You may also like...

Leave a Reply

Your email address will not be published. Required fields are marked *