【MEKO芫荽茶似足廁所水 芒果味芬達甜到叫救命】伏務台

日本人嘅創作力量同幻想成日都嚇人一跳,繼之前嘅芫荽醬喺日本同香港、台灣等地掀起一陣芫荽熱之後,今次輪到MEKO推出咗一款名為芫荽檸檬草茶(HKD8.5)嘅飲品!真係聽到個名都標冷汗呀大佬,做咗一輪心理準備,小編終於的起心肝try try佢喇!買芫荽茶嘅時候見到芬達都出咗新口味-芬達芒果味汽水(HKD8.9)喎,見芒果味好似幾fresh咁就一次過買返嚟試啦。如果芫荽茶太難飲都有啲嘢啷吓口吖嘛……

一嚟打咗大佬先啦,等我打開個蓋聞吓先,嘩!真係好荽喎陣味!倒埋落玻璃杯睇吓個顏色先,偏透明,好似一杯放咗兩日嘅水咁,有少少黃黃哋,好似可以攞嚟整蠱吓人喎!不過小編好快已經俾佢嗰陣酸酸哋嘅荽味薰到有啲反胃喇!為咗滿足好奇心,都要合埋眼飲一啖啦!我都唔識形容嗰陣酸酸臭臭嘅味,真係有芫荽味嘅,不過係廁所水味更濃囉!冇錯呀,就係你洗廁所嗰陣會聞到嗰陣味道喇!

利申咗先,小編係超級無敵唔鍾意芫荽本人嘅。所以我覺得我一個人主觀嘅意見對於呢樽芫荽檸檬茶唔係太公平,於是我又搵嚟好熱愛芫荽嘅同事試飲。結果呢,連本身食米線都會叫多芫荽嘅同事A都話:「唔得喎,好似廁所喎陣味!」。睇嚟今鋪連芫荽愛好者都唔係好接受到呢支芫荽檸檬草茶喎!睇埋佢個成份表,睇落出事嘅應該係檸檬草x蜂蜜x芫荽呢個組合喇……

飲完廁所水,啊不,芫荽水定茶啦,之後就試吓芒果味芬達啦!一打開個蓋我就隱約見到啲糖同我揮緊手,聞落去真係世界級咁甜,但同時芒果味唔濃,直頭有個「甜」字喺樽口度冒出嚟呀!飲一啖落發覺甜到甩牙之餘,有一陣令人懷念嘅味道……咦,係羅拔臣啫喱糖嗰陣味喎,不過佢再加多咗一百羹糖左右啦,飲咗兩啖我直頭覺得會即刻有糖尿病,成個口都係甜到震嘅假膠芒果味。

不過都冇辦法嘅,買親芬達都預咗佢甜到癲㗎喇。不過冇諗過佢比本身嘅橙味同提子味都甜得更癲,同埋嗰陣芒果啫喱糖嘅味喺口入面久久不散,係有少少困擾咁囉!同埋飲多兩樽真係要戒糖一星期,唔係真係驚會糖尿病呀!

小編伏氣:其實芒果味芬達講伏就真係拍馬都追唔上飲品界嘅伏中之王芫茜水喇,如果你問我今次呢支難飲啲定上次嘅伏界冠軍櫻花蝦味汽水難飲啲呢?我就真係唔識答喇,一個係腥臭、一個係廁所水味,你揀喇!小編真係唔識揀呀,不如雙冠軍啦,ok!

MEKO芫荽檸檬草茶
入伏點:7-eleven

入伏價:HKD8.5

芬達芒果味汽水
入伏點:7-eleven
入伏價:HKD8.9

中伏by #肥仔文
美術by #mui mui
攝影by #肥仔文

《伏務台》星期一伏務大眾,歡迎各界報料。

You may also like...

Leave a Reply

Your email address will not be published. Required fields are marked *