【觀塘工廈隱世抹茶high tea 富士山芝士餅最呃like】嚐品慕茶

邊個話high tea一定要去酒店捱貴價英式下午茶㗎?最近喺觀塘工廈入面嘅餐廳嚐品慕茶就同日本老字號茶行丸安茶葉聯乘,設計咗以抹茶為主題嘅抹茶和風下午茶套餐(HKD258/2位)。嘩!身為抹茶控嘅小編當然率先衝去啦!

雖然餐廳開喺絕對唔算旺嘅路段,但冇諗過平日3、4點都有唔少人食緊tea喎!餐廳裝潢清新,帶點文青感又唔會太作狀,空間感十足。介紹返,今次餐廳除咗同丸安茶葉合作之外,仲同本地年輕藝術家Miss Fat搞咗個小小小型作品展覽,有幾幅Miss Fat嘅畫作同埋兩款手繪雕塑,佢嘅作品主題都圍繞住香港,顏色好繽紛睇落令人心情好舒暢。雖然展覽真係好小型,不過食住tea又可以欣賞吓本土藝術,係開心嘅!

好喇,入正題!率先上枱嘅係鹹點,分別有日式照燒牛肉滑蛋三文治素炸雞槌配抹茶芝士醬牛油果煙三文魚蟹籽酥盒巴馬火腿哈蜜瓜卷同埋抹茶冷麵。小編覺得全部鹹食無論賣相定味道都幾好喎,細細嚿一啖食晒唔會太飽,因為要留肚食甜品嘛(心心眼)。

最有驚喜係素炸雞槌,小編開頭以為似齋扎肉嗰種質地,點知咬開入面原來係腐皮嚟!好多好多層腐皮喺裡面,感覺唔怪之餘仲意外咁Fresh添!鍾意素小食嘅朋友一定要試吓呀!不過個抹茶醬好唔好味就真係見仁見智喇,因為小編就覺得冇咩特別,其實佢個抹茶味唔算好香濃,大家可以試一啖仔再決定點唔點嚿雞槌落去喇!

Tea set嘅重頭戲嚟喇!一定為咗吸睛又好味嘅甜品啦!甜品拼盤一上到枱小編就心心眼喇,事關無論係佢個托盤、碟仔抑或食物嘅擺法都好日式,碟仔細細咁,好卡哇伊呢呀!好似全部都好好食咁,我唔客氣喇!

呢幾款甜品賣相都好精緻,最吸引當然係呢個富士山形狀嘅抹茶芝士蛋糕啦,賣相好可愛。呢個Cheese cake十分足料,丸安抹茶粉同Cream cheese製成,啖啖都係香濃嘅抹茶同芝士味,好滿足呀!食多幾啖係有少少漏,如果同朋友吹住水慢慢歎係可以食晒成個嘅!

雖然呢個蜂蜜岩燒抹茶蛋糕就冇富士山Cheese cake咁吸引,不過食落口蛋糕面頭嘅蜂蜜芝士有點成膠嘅狀態,配埋底下鬆軟嘅抹茶海綿蛋糕簡直係一絕呀!小編更自創食法,將抹茶手工雪糕好似食心太軟咁mix埋落呢個抹茶蛋糕一齊食,感覺超match呀!順帶一提,佢哋嘅雪糕用嘅係almond milk,所以純素食者都可以食㗎!

下午茶套餐包兩杯嘢飲,可以揀抹茶焙茶或者玄米抹茶拿鐵,不過小編就貪心啲加錢升級咗杯日式芭菲特飲(HKD30)。你見呢個芭菲特飲裝到咁滿,就知佢落足料啦!佢用咗法式可麗餅包住馬卡龍、白玉、海綿蛋糕、抹茶蕨餅同埋兩球雪糕,雪糕可以自選口味,分別有抹茶、焙茶同埋玄米茶味;下層就由粟米片、忌廉同埋抹茶凍飲組成,食完上層可以飲埋個茶消吓滯喇!利申:呢個芭菲嘅分量屬於勁量級,基本上2個女仔食完頭先嘅鹹食同甜品再叫一人一個芭菲應該會食唔晒,所以應該叫一杯share,咁就唔會太飽喇!

 

嚐品慕茶
地址:九龍灣偉業街89號昌興工業大廈閣樓
電話:3421 1944
供應日期及時間:2018年4月9日至6月30日;星期一至六:15:00-18:00;星期日:14:00-18:00

You may also like...

Leave a Reply

Your email address will not be published. Required fields are marked *