【18蚊超濃郁芝麻卷 必食清新忌廉南瓜糕】平霸

平霸搵食,今次小編去咗太子好出名嘅大記攦粉糕點專門店,連蔡瀾都曾經推薦過㗎,佢哋嘅糕點真係好出名呢!

呢排天氣開始熱,食吓糕點解吓暑都不失為一個好選擇!

件裝糕點(HKD7/一件),30蚊有5件,除返開都係6蚊一件,算抵食㗎!小編就叫咗香滑椰汁糕忌廉南瓜糕同埋清熱綠豆糕。香滑椰汁糕一入口已經有勁香濃嘅椰汁味,食落去甜度剛剛好,好滑好動L呀;而忌廉南瓜糕就最有驚喜,冇諗過南瓜整成糕點會咁好食,入面仲有啲南瓜蓉,味道微甜,好清新!另外唔好以為清熱綠豆糕冇乜特別喎,呢個小編都推薦,食嘅第一啖完全係綠豆沙嘅濃縮版,有啲沙沙嘅感覺,好正呀!每件糕      點都有獨立包裝,咁就唔怕唔衛生啦!每件睇落好似好細件,但都幾有厚度㗎!

芝麻卷(HKD18),18蚊3件,未食已經聞到好大陣芝麻味,入口簡直好似食緊芝麻糊咁,芝麻香味喺口腔爆發,係有料到嘅!

砵仔糕(HKD15/2件),一樣都係獨立包裝,有白糖、黃糖同黑芝麻揀,一盒盒擺好晒俾食客自己揀。有啲無豆嘅,今次小編揀嗰盒係黃糖同黑芝麻,上面仲要有好多豆添!不過砵仔糕味道就普普通通喇,個人覺得黃糖仲好味過黑芝麻,同埋糕面啲紅豆唔會話爛晒,仲係一粒粒好硬身咁,同其他地方食到嗰啲真係有分別喎!

平霸小評:今次呢間大記果然名不虛傳!佢嘅糕點真係好食喎,買30蚊5件就更加抵喇,又可以試到多啲唔同味嘛!糕點迷唔可以錯過呀!

大記攦粉糕點專門店
地址:太子基隆街10號地下
電話:2787 1398
營業時間:
星期一至日:11:00 – 22:30

《平霸》平食四方,歡迎各界報料。

You may also like...

Leave a Reply

Your email address will not be published. Required fields are marked *