【退休夫婦開秘境書屋 慢活享受書香菜味】比比書屋

元朗掃街就去得多喇,咁你又有冇去埋錦田呢?錦田少啲擠逼感、冇講住普通話拖住喼嘅自由行、亦都冇急急忙忙嘅上班族,硬係覺得喺西鐵錦上路站落咗車之後,就走入咗一條秘道咁,近乎冇乜舖頭,最常見嘅只係由街坊開嘅一間小小士多,無冷氣無人招呼,但感覺又好鬼輕鬆喎!今日小編就推介呢間比比書屋,正正就喺錦田喇!

聽到比比書屋呢個名,直覺係好文青、好fantasy嘅名。主理人係一對退休嘅註冊社工夫婦,佢哋係老闆蔡文元(Ringo)同埋老闆娘李秀麗(Teresa);而書屋之所以叫做比比,就係因為呢隻狗仔喇!佢叫比比,今年六歲,好QQ呀!

老闆養嘅小狗比比。

比比書屋大家可以放慢腳步,睇吓書、食個餅咁。老闆話開頭只係一間「書房」,係後來有客人向朋友推薦呢度好relax好舒服,愈來愈多人拜訪,後來先成為一間「書屋」。「慢活,才是生活」呢個係店主夫婦深信嘅座右銘,亦係佢哋嘅生活態度。作為退休社工,Ringo同Teresa選擇放棄鬧市嘅繁榮生活,喺錦田打造一個寧靜而悠閒嘅空間,可以「避吓世」,暫時逃離生活同工作嘅煩惱,全情投入喺書香同大自然之中。

書屋外有小型嘅農地,種植咗唔同嘅植物同蔬菜,例如有羽衣甘藍、蕃茄,連咖啡豆樹都有添!喺呢度喺冇餐牌冇價錢嘅,咁想食嘢又點?只要客人每人帶走最少一本標價HKD100嘅書,老闆就會提供食物同飲品俾到訪書屋嘅客人喇;而唔講唔知,小小嘅書屋裡面竟然有5000幾本藏書,題材上至天文下至地理都有,書蟲如小編聽到即刻心心眼呀!

如果客人自己帶埋書嚟寄賣嘅話,仲可以「以書換菜」添,即係有得攞走一種當造新鮮菜!啲菜全部都係老闆親手種㗎,真係食得安心又開心呀!

睇睇吓書覺得有啲肚空空咁就可以試吓佢哋嘅招牌沙律喇,呢個沙律就犀利喇,材料超級豐富。由椰菜、蕃茄、楊桃、羽衣甘藍同提子乾等等嘅配搭,再加入自家製黑醋沙律汁。口感清爽得嚟層次好豐富,唔會食到口寡寡,仲好開胃添!

另外呢個羽衣甘藍醬多士亦係推介之一,開頭見到個醬嘅顏色,以為會有啲草青味啦,點知食落口非常幼滑,味道濃厚;而多士就十分鬆軟。醬同多士都係自家製,感覺超fresh超天然,第二度食唔到㗎!

飲品方面,果汁全部都係用農場種植嘅植物新鮮打出黎,款式同口味就跟季節收成而定喇!呢期就有紅菜頭汁同埋羽衣甘藍汁。顏色好吸引,飲落口就更加驚喜,係一種喺出面飲唔到嘅天然味道,因為全無添加防腐劑,好fresh好健康呀!

小食方面就有砵仔糕雞屎藤同埋馬拉糕喇,呢度嘅馬拉糕同坊間有啲唔一樣,口感比較濕潤,有啲似雞蛋糕咁;雞屎藤十分煙韌;而砵仔糕就比較厚實,每一口都食得出自家製嘅風味。好老實講,呢度嘅食物絕對唔係米芝蓮級,但當中多咗一般餐廳無嘅人情味同心機,窩心嘅感覺係連鎖餐廳俾唔到嘅!

除咗比比之外,呢度原來仲有其他動物㗎。小編認為比比書屋最吸引嘅地方除咗自家製嘅天然食物同埋書之外,人情味先係令到小編樂而忘返。喺呢度冇人會催你埋單,你鍾意坐幾耐就幾耐,你有你睇書,出面嘅羊有佢哋自己食草。好難得香港有一個咁樣嘅空間俾大家同大自然共處吓喎,正呀!

比比書屋
地址:香港新界錦田大江埔村67號
電話:5225 4119
營業時間:星期五:14:00-2200;星期六:10:00-1800

You may also like...

Leave a Reply

Your email address will not be published. Required fields are marked *