【大學學會訂咗嘢食「失蹤」 小店老闆:要有交帶!】食焦

不要浪費食物!做人仲要有交帶同責任心㗎!話說公開大學學會同一間喺何文田嘅小店訂咗盒130蚊嘅煎炸嘢食,有炸餃子、春卷同咖喱角嘅大拼盤,約好晒會五點半去攞,結果到八點收舖都唔見人,小店老闆又電話又WhatsApp都冇回音!於是老闆只好將盒嘢食放咗喺舖頭旁邊嘅小枱度喇!

成大盤炸嘢,如果最後真係冇攞到,嘥錢又浪費食物呀!(牛津粉麵fb專頁圖片)

其實小店耐唔時都會用成本價價錢俾啲學生哥,所以最初嘅價學會就話想50蚊,但係價錢可再傾!(牛津粉麵fb專頁圖片)

開始冇回音喇!(牛津粉麵fb專頁圖片)

小店老闆將呢件事po咗上網,話「到8:00收舖都唔來?連一個電話也沒有?第三世界上真係有好多人是正在饑荒……你哋都130蚊都俾左啦!點解你唔來?對你無著數,真係講多次非常浪費……」

最後傾掂個價係百三蚊,錢俾咗但係人就失咗蹤冇攞到啲嘢食喎!老闆就將成件事喺網上交待喇!(牛津粉麵fb專頁截圖)

收咗舖都係冇影,咁老闆就惟有擺盤嘢喺舖外嘅小枱上面!(牛津粉麵fb專頁圖片)

第二朝學生會先WhatsApp老闆道歉,話原来係因為尋晚有就職典禮好忙,又冇帶到電話,所以先完全冇回音囉!到咗凌晨兩點先醒起唔記得叫人去拎嘢食喎!「我們已立即到貴餐廳領回食物……避免浪費食物……亦不想浪費貴餐廳心血……」仲話已經將盒嘢食食晒咁話!

呢個解釋同道歉,大家又接唔接受呢?(牛津粉麵fb專頁圖片)

真係有攞返啲食物,不過係凌晨兩點後囉!學生仲話已經食晒冇嘥到嘢㗎!(牛津粉麵fb專頁圖片)

網友點睇?有人話學生唔啱又話埋依家啲九十後梗係唔掂、有人就覺得既然都俾咗錢唔記得去拎啫,咁樣公審唔係咁好囉!老闆點睇?有來有往,人哋都道咗謙,老闆都公開咁話「我只係要有交帶!該學會已有回覆,亦講凌晨兩點找人來拎去食晒,我由始至終主要係有交帶!人要有承擔!責任!不浪費!」

老闆話只係想要有交帶!(牛津粉麵fb專頁截圖)

只係嬲浪費啫!(牛津粉麵fb專頁截圖)

文字上道咗謙都未夠,原来為表誠意仲當面賠罪添!老闆再po文講返「今日整個學生會主要成員一起來道歉,這種共同進退!共同承擔責任!呢點真係唔係人人做到……」老闆啖氣落晒,班學生又唔使俾網友再話廢青冇責任心,總算大和解,應該食返多盤炸嘢慶祝吓啦!

大和解!當面道埋歉,梗係再嬲唔落啦!(牛津粉麵fb專頁截圖)

其中一位有份嘅學生就留言話道歉係佢哋嘅責任!(牛津粉麵fb專頁截圖)

You may also like...

Leave a Reply

Your email address will not be published. Required fields are marked *