【大熱漢堡4區巡禮 爆芝爆肉流心大包圍】時新漢堡飽、Top Blade Steak Lab、Vortex American Snack Bar、MR&MS BURGER

依家潮興食Burger,最好就大件夾抵食啦!我哋就同大家精選咗4個區,由港式、美式同英式都搵到Burger之最,一齊食盡佢!

黃埔代表 港人港味

時新漢堡飽喺黃埔重開直頭係港人福音,那些年嘅回憶返晒嚟!好多公公婆婆同學生哥都去幫襯㗎。

單層漢堡包(HKD20)係時新第一代嘅「雜港包」,只係依家嘅漢堡扒轉咗用純牛肉,唔係早期咁溝雞肉同豬肉,依家兒童餐都係跟呢款包。入口一食到沙律醬,嗰種味道仲令你想講「係香港嘅味呀!」。

單層可能唔夠大人攝牙罅,雙層漢堡芝士蛋包(HKD30)就豐富得多。呢個配搭非常Juicy,加上煎到啱啱好嘅蛋同惹味漢堡扒,真係必食首選。不過重開之後大家都好踴躍支持,所以雙層漢堡包嘅供應會隨機應變,轉做只賣單層款式,因為老闆想嚟到嘅人都可以試到時新嘅包。

 

時新漢堡飽
地址:紅磡德康街398-402號黃埔新天地家居庭地下G22-G23號舖
電話:2387 2868
營業時間:星期一至日:11:00-20:30

 

何文田代表 英式風情

喺何文田嘅Top Blade Steak Lab專賣Flat Iron牛扒(牛肩胛部位嘅翼板肉),但都會用嚟整Burger。Flat Iron肉質軟腍似牛柳,但又似西冷扒咁肉味香濃,不過要花時間挑筋,所以少地方賣囉。

輕怡版漢堡包 (HKD68/平日12:00-16:00供應)用咗半份牛扒整成,夾住成片肉見到都為之瘋狂!裡面仲有自家製嘅原粒醃蕃茄,令成個包更加Juicy!知大家想健康啲,所以沙律醬溝咗藜麥。跟埋一份黑松露鹽味薯條,又飽又抵食!

大胃王可以食新出嘅終極漢堡包餐(HKD160/全日供應),塊漢堡扒用咗兩款牛扒嘅肉整成,有7安士咁多,小編一啖只係咬到成個包2/3嘅厚度咋。個包仲夾咗兩款芝士、墨西哥脆片,所以配咗啲醃紫洋蔥、蕃茄同沙律菜,少少酸味味令你冇咁滯。今次薯條可以無限任食,唔少人都會re-order,因為真係幾脆口同惹味。呢度兩款包都想俾大家食到多啲牛嘅原味,唔會用太多醬汁去封殺你嘅味蕾,反而用多啲蔬菜去令Burger增加口感同清甜嘅口味。

 

Top Blade Steak Lab
地址:何文田梭椏道4A號榮英大厦地舖
電話:3956 2011
營業時間:星期二至日:12:00-16:00,17:30-22:00

 

將軍澳代表 巨人肉陣

將軍澳都有唔少選擇㗎,Vortex American Snack Bar就係其中一間,以美式食物做主打,都幾肉肉肉㗎。

老闆話洛杉磯漢堡(HKD108)係特登為呢間舖而特別設計嘅!入面主要係煙燻豬肉,冇牛嘅成份,咁就啱晒啲唔食牛肉嘅朋友仔啦。

芝加哥漢堡(HKD138)簡直係巨無霸嚟,雙層芝士同雙層牛肉,勁爆juicy!超好食呀!而且啲肉啱啱好,唔會過熟仲會見到啲粉紅色,食到小編舔晒脷呀!再配埋薯片同牛油果醬,OMG!

 

Vortex American Snack Bar
地址:將軍澳唐明街1號富康花園地下46號舖
電話:2388 7133
營業時間:星期一至日:18:30-03:00

 

荃灣代表 傳統美式

荃灣嘅MR&MS BURGER幾有美國小鎮酒吧feel,飲吓手工啤都幾歎。

龍脷柳流心蛋漢堡(HKD68)比牛肉漢堡更出色!一定要試呀!龍脷柳夠晒大塊,炸到金黃香脆,店員教路,食之前要壓扁個包,壓爛隻蛋等啲汁流出嚟先正。呢個醬似他他醬咁酸酸哋,配魚食一流!

選用咗較重牛油成份嘅麵包,塗上一層牛油再煎烘後更加外脆內軟,MRMS傳統美式漢堡(HKD68)漢堡扒調味出色,肉味濃郁,最鍾意佢個醬,唔係一般沙律醬味道,自調配方仲多咗陣酸甜果香,可以減低飽滯感,中間塊煙肉都煎到卜卜脆㗎!

 

MR&MS BURGER
地址:荃灣海壩街77號地舖
電話:從缺
營業時間:星期一至五:17:00-23:00;星期六及日:12:00-23:00

You may also like...

Leave a Reply

Your email address will not be published. Required fields are marked *