【「好好肉」得返2粒仔肉 沙田榴槤黑店多客中招】食焦

呢個時候唔少榴槤控都出動,諗住趁當造嗒返啖又香又濃嘅榴槤肉!不過遇著啲生果檔衰黑心,專入渣貨就真係黑仔喇!好似有網友喺沙田瀝源邨檔生果檔,210蚊買咗兩個榴槤,買嗰陣店員仲話「好好肉」,點知返到屋企一開,五瓣肉有三瓣係冇嘅,另外兩瓣只係得返2粒肉仔,係一毫子咁大嘅肉仔喎!唔嬲就假啦!

呢2粒仔係肉定係核?見到係咁好難唔嬲喎!(沙田友fb群組圖片)

苦主雖然冇開名係邊間舖,但係好多人已好肯定咁估到係邊間,因為有唔少人都瀨過嘢!(沙田友fb群組截圖)

又係存心欺騙事件!(沙田友fb群組截圖)

嬲還嬲,都要影咗相先,跟手落去檔嘢度嘈啦梗係,點知檔主竟然唔肯退貨!苦主留言「仲話我地(哋)搵佢錢(笨?),因為越來越多街坊圍觀才最後退了$100!」。網友喺群組po咗事發經過同張得2粒肉仔嘅榴槤相,原来有唔少街坊都瀨過嘢喎,呢間生果店個朵已經臭晒喇!

出晒名係黑店喎!(沙田友fb群組截圖)

唔使再幫襯最實際!(沙田友fb群組截圖)

有網友留言話「果間不嬲都係黑店嚟㗎喇!好耐之前幫佢買榴櫣點知揀個生嘅唔熟返到屋企先知呀!然後落去搵佢話佢比(俾)個唔熟嘅榴櫣我,然後老板(闆)好串咁話唔熟咪返屋企蒸熟佢囉!」嘩,咁樣叫個客返去蒸熟佢都得?又真係離譜啲喎!

兩個月前已經有網友喺另一個群組大控訴喇,呢次係有好多肉,不過係又黑又灰兼出晒水嘅!(中伏飲食報料區fb群組截圖)

再睇返黑歷史,其實兩個月前喺另一個群組都有人中招,又係呢間呀!呢位苦主係買咗一個400蚊貓山王,返到屋企一開發現啲肉又黑又灰,仲要出晒水!當然店主又係唔肯換又唔肯退錢啦,只係話下次買就計返平啲喎!試問仲邊有下次呀?睇嚟呢間店真係好唔掂,榴槤似乎仲係中招嘅重災區添,下次仲肯幫襯佢,記得當場開咗榴槤先喇!

叫個客返屋企蒸熟咪得囉!真係太幽默喇!(中伏飲食報料區fb群組截圖)

網友交待歷史。(中伏飲食報料區fb群組截圖)

明智做法應該係咁!(中伏飲食報料區fb群組截圖)

You may also like...

Leave a Reply

Your email address will not be published. Required fields are marked *