【銅鑼灣三大火鍋比併 邊間最麻辣又好食?】麻神麻辣火鍋、雲長小龍坎老火鍋、渝味曉宇重慶老火鍋

雖然依家天氣開始熱返啲,不過邊個話唔可以打邊爐先?夏天打邊爐就好似冬天食雪糕咁,咁先正㗎嘛!今次小編就搵咗三間喺銅鑼灣嘅麻辣火鍋,睇吓邊間最好食啦!

 

麻神麻辣火鍋-台灣過江龍,一聽個朵都知有料到!有唔少明星名人都爭住捧場,城城郭富城就一個星期要食足幾晚先滿足添!

麻神鴛鴦湯底(HKD228/1-2人份)只有昆布同麻辣兩款湯頭,咪睇昆布湯得兩條海帶飄吓飄吓,味道好濃㗎,好有日式風味。麻辣湯頭只有一個辣度,而最特別之處係湯底只以新鮮蔬菜、水果、秘製嘅麻辣醬、紅椒乾、辣椒粉等各式香料調配,係全素㗎!香料味濃郁但唔會蓋過食物原味,以純素調配減低油膩感;入口有別一貫對「麻辣」嘅印象,真係唔嗆喉又飲得落肚,仲食到食物嘅原味添!

食麻辣湯會跟人頭每人有一件招牌果凍鴨血(HKD88)隨鍋上,鴨血用秘製湯料浸足幾日,賣晒就冇,要等下一批。食嘅時候一定要用刀叉切,減輕湯汁受壓而逼返出嚟嘅程度。口感名副其實好似果凍咁滑入口,真係有驚喜!

 

美國頂級牛小排(HKD288/200g;HKD388/300g)係麻神嘅招牌牛肉之一,質感好似厚身嘅肥牛咁,但浸熟之後仍然好嫩滑,確實幾滋味。

綜合丸子拼盤(HKD118)有梅菜豬肉丸、鯪魚丸、墨魚丸同蝦丸各兩粒,全部都係手打丸,好彈牙。最鮮甜味美嘅係蝦丸,蝦味濃到好似食緊精華咁,絕對值得獨立叫一份!

 

★★食物款式:主打多屬特色火鍋料,選擇不算多。
★★湯底麻辣度:因為麻神個湯底係全素,當湯咁飲都得,所以麻辣度不算高。
★★性價比:人均要六百上下,再食多次也要考慮一下!

麻神麻辣火鍋
地址:銅鑼灣登龍街1-29號金朝陽中心2期Midtown 25樓
電話:2341 0999
營業時間:星期一至日:18:00-00:30

 

雲長小龍坎老火鍋-老細係陳柏宇,大大個生招牌喺度,吸引咗唔少粉絲幫襯,等小編都捧吓場,睇吓有幾正宗嘅四川風味喇!

紅油藥膳鴛鴦鍋(HKD138),佢個麻辣湯底唔係好辣,不過飲落口就有好重嘅麻辣香味,飲得出係用咗唔同嘅辣椒同材料熬成,而且一啲都唔油,好惹味呀!食唔到辣嘅朋友仔記得要叫小辣,因為個湯底會愈食愈辣,食到小編頭皮發麻,好過癮㗎;而另一款藥膳湯底就充滿濃濃藥材味,足料又濃郁,好好飲呀!

龍廚八寶摩天輪(HKD118)有水餃、雲吞、牛丸、豬肉丸同墨魚丸等等,拎到出嚟夠晒氣派,又可以一次過試晒唔同嘅食物。

巴蜀麻辣牛肉(HKD108),睇見都出緊汗喇,牛肉上面沾滿辣椒同香料,見到都覺辣呀!食一嚿已經辣到小編不行了,愛辣人士可以挑戰吓喎!

紅糖糍粑(HKD58),食完啲辣嘢梗係要食返啲甜嘅中和返啦。糍粑其實係糯米滋拎去炸,再淋上糖漿,食落煙煙韌韌外脆內軟。

 

★★★★食物款式:選擇同種類都好多選擇。
★★★湯底麻辣度:辣度麻度也夠勁!
★★★性價比:價錢嚟講算合理。

雲長小龍坎老火鍋
地址:銅鑼灣記利佐治街1號金百利廣場7樓R3室
電話:2761 3300
營業時間:星期一至日:16:00-23:45

 

渝味曉宇-重慶過江龍名店,曾經喺內地媒體舉辦嘅「尋找重慶火鍋五十強」之中,渝味曉宇就攞過排名第一,相當有人氣呀!

九宮格麻辣大紅鍋(HKD38),湯底個價錢係小編食過最平嘅一款,呢個仲要係鎮店之寶嚟添!入面啲辣椒分量十足!有九格係方便客人放唔同食物落去。個鍋一路燒,小編個鼻已經好刺激好想打乞嚏,坐耐啲開始出汗,真係夠晒正宗,不愧為重慶火鍋五十強第一名啦!另外湯底都加咗啲牛油落去,所以散發出嚟嘅味道係非常之香,食落又辣又麻,好過癮!

美國安格斯優質肥牛(HKD198/份),就咁睇都可以見到啲脂肪分佈得好平均好靚,放落去5-10秒就食得,超重牛味,非常好食!食之前記住要浸一浸麻油先,一嚟可以減輕辣度,其次食落味道都更加香濃,正喎!

大刀牛肝(88/份),因為內地人鍾意食內臟,所以店內都有唔少內臟選擇;而呢個牛肝就最受食客歡迎,上面有隻鵪鶉蛋撈勻嚟食,牛肝就會再滑啲。口感唔會好似食豬潤咁多沙,食落都幾爽,而且有埋特製嘅辣粉,可以辟腥又惹味。

牛心椗(HKD58/份)即係連接住牛嘅心臟上面嘅大動脈,本身諗住會好似肥膏咁嘅口感,點知食落又幾爽口喎!平時好少見,一試無妨。

重慶炸酥肉(HKD58)用咗肥瘦相間嘅五花肉,再加埋五香調味料同青椒等醃至入味,食落非常酥脆!加上少少麻辣感,好食到令人停唔到口呀!

 

★★★★食物款式:選擇多至五十款,種類也較多!
★★★★★湯底麻辣度:未食已經出緊汗,可想而知有幾咁麻辣!
★★★★性價比:湯底只賣38蚊就知道價格好親民,再幫襯都抵!

渝味曉宇重慶老火鍋
地址:銅鑼灣渣甸街50號渣甸中心8樓
電話:3703 9318
營業時間:星期一至日:12:00-16:00;17:30-00:00

You may also like...

Leave a Reply

Your email address will not be published. Required fields are marked *