【生日快樂變殘體字祝賀 餅店補鑊網民鬧冇誠意】食焦

一個生日蛋糕嘅祝賀牌,竟然都可以貨不對辦喎!事緣係有人喺大埔間餅店買咗個生日蛋糕,仲加咗十蚊加個祝賀牌,喺訂單度已經清楚寫明係「姨丈 生日快樂」,點知第二日事主去攞cake嘅時候,竟然發現變咗簡體字嘅「生日快乐」,O嘴之餘梗係唔收貨啦!

睇真啲,唔止係殘體字,姨丈係變咗姨文囉!邊位呀?(Tai Po 大埔fb群組截圖)

殘體字蛋糕98蚊加10蚊生日牌,最後退返錢都係咁話啦,事主仲要買咗兩個喎!(Tai Po 大埔fb群組截圖)

據事主po喺Tai Po 大埔群組嘅內容,嗰位餅店嘅店員確係妙問妙答嘅!事主眼見變咗殘體字梗係嬲爆,佢即刻問個店員點解啲字會咁核突同變咗簡體字,點知店員答佢:「你無講明寫繁體字!」、事主再問佢知唔知呢度係邊度,佢竟然答:「昌運(餅店位置)!」。笑死定嬲死先?

蛋糕已經夠核突,加埋生日快乐呢四粒字,唔食得落喇!(Tai Po 大埔fb群組截圖)

睇嚟又係file成呎厚嗰隻!(Tai Po 大埔fb群組截圖)

呢啲中港矛盾位實引嚟網友熱烈討論㗎喎,最多反應係寫簡體字固然令人眼凸啦,重點係,幾乎每個網友都話個蛋糕真係好核突,自己喺屋企求其整個都靚過佢,仲俾眼利網友發現,呢個蛋糕同餅店喺網站po出嚟嘅蛋糕樣,完全係貨不對辦!而事主原来當日係訂咗兩個蛋糕,一個for生日、一個係母親節,擾攘咗大半個鐘,「昌運姐」先肯退返錢!

照騙原圖係呃得吓人嘅!(238°C Bakery fb截圖)

睇多次,真實圖片係咁㗎!(Tai Po 大埔fb群組截圖)

出事餅店就係大埔昌運中心嘅「238°C Bakery」,知道瀨咗嘢搞咗場公關災難,梗係要即刻救火啦!喺fb專頁度就出po道歉,「因本公司最近出現人事變動,昨日蛋糕牌事件屬第一日入職的新同事不熟悉公司運作所引致,已作出內部處分及會加緊培訓新入職同事。本公司對此事致萬二分歉意。」不過網民一樣唔收貨,話佢冇誠意喎,原来又係衰del人留言囉!其實都道得歉,不如好好哋答吓人留言,好過del咗俾人唱啦!

餅店道歉都救唔返呢次災難喎!(238°C Bakery fb截圖)

del嘢累事喇!(238°C Bakery fb截圖)

網友又說出重點來!(238°C Bakery fb截圖)

You may also like...

Leave a Reply

Your email address will not be published. Required fields are marked *