【秀茂坪街市驚喜小食 爆餡餃子石磨腸粉超掂】街霸

上兩個星期都喺新界搵食,今個禮拜街霸就同大家去九龍區嘅街市喇!據探子回報話觀塘秀茂坪寶達街市翻新完之後都幾多好嘢食喎,今日一於帶大家嚟呢度試吓!

呢個街市都真係幾整齊乾淨,唔似得傳統街市咁濕漉漉,連魚檔同豬肉檔都非常企理,唔錯唔錯!

行到最入呢就有一條細細嘅小食街,大概有7-8間小店咁啦!街霸首先就俾呢間食好啲嘅招牌石磨腸粉吸引住喇,普通撈甜醬、花生醬嗰啲腸粉就食得多喇,有得加隻蛋嘅腸粉又真係未食過喎!

石磨腸粉比較薄身,同埋個樣係皺皮嘅,但皺得嚟同時又好滑,好複雜呀!街霸叫咗呢個叉燒石磨腸粉(HKD26)再加咗隻蛋(HKD3)。開頭覺得成30蚊食個腸粉有啲貴,但係見到個分量咁巨大之後,又覺得其實都值喎!

雖然好大份,但因為腸粉皮做得好薄,所以冇嗰種食咗一堆粉糰落口嘅飽滯感,仲食唔停口添;加埋隻蛋感覺異常咁match,口感更豐富!極力推介呀!

食完石磨腸粉都有啲飽㗎喇,不過見到隔離呢間撈得掂勁多學生哥圍住喎,咁街霸都唔執輸睇吓有咩好食啦。見到有個妹妹攞住份好似煎蛋餅咁嘅物體幾吸引,於是問吓老闆娘係咩嚟啦,原來係蠔餅(HKD30)呀!超愛蠔餅嘅街霸即刻order咗一份試吓!

通常食親蠔餅都係喺大排檔食炸到好金黃嗰種,今次呢個蠔餅就有啲唔同,望落去比較似煎蠔蛋餅,又有啲似細個媽咪整嗰種家常蠔餅,以煎代炸,少啲油健康啲嘛!

雖然冇潮洲式蠔餅咁香口,不過作為小食都真係唔錯嘅,同埋都幾飽肚,下午茶食一份蠔餅就夠晒喇!

食到飽飽哋臨走之際見到呢間皇后餃子嘅老闆娘喺度狂包餃子,一向嗜餃子如命嘅街霸又被「吸」咗過去喇(為大肚腩默哀)!

佢呢度啲餃子有得揀煎定湯嘅,街霸要咗3隻韭菜餃(HKD10),見到佢煎到咁金金黃黃即時食慾大振呀!

一咬開就見到餃子真係爆餡㗎,超多肉同韭菜,10蚊3隻真係幾抵食!正呀!

 

街霸最愛:餃子係真愛呀哈利!個皮厚薄度啱啱好,韭菜食落好新鮮好香口,完全搵唔到挑剔嘅地方!

食好啲
地址:觀塘秀茂坪寶琳路2號寶達商場地下M.C. BOX
電話:無
營業時間:不定

撈得掂
地址:觀塘秀茂坪寶琳路2號寶達商場地下M.C. BOX
電話:無
營業時間:不定

皇后餃子
地址:觀塘秀茂坪寶琳路2號寶達商場地下M.C. BOX
電話:無
營業時間:不定

You may also like...

Leave a Reply

Your email address will not be published. Required fields are marked *