【樽仔奶茶名震上環街市 必食瑞記蛋牛包+西多】街霸

今集街霸帶大家嚟到上環街市入面好出名嘅瑞記,平日晏晝嘅熟食中心整體人流唔算多,但瑞記呢度竟然都坐到爆喎,可想而知有幾堅啦!

呢度仲用緊舊式花碼字所寫嘅餐牌,夠晒港式味道呀真係!唔知點解小編真係好鍾意呢塊餐牌呀,又有味道、字又寫得靚,希望呢間小店長做長有啦。依家仲寫呢類花碼嘅餐牌真係買少見少喇!(當然舖頭亦提供寫阿拉伯數目字嘅餐牌方便食客參考)因為其實……連小編都唔係好記得點睇喇。小編又考考大家,如圖中餐牌所示,蛋牛包係幾多錢呢?依家俾啲時間大家諗吓,陣間開估!

瑞記其中一個名物就係,登登登凳,樽仔奶茶喇!樽仔奶茶其實一早已經沖好咗,一支支棟晒喺度咁俾大家落柯打嘅。小編有啲八卦於是問吓伙記點解奶茶好哋哋要入落樽仔啦,係咪同普通奶茶有咩唔同?點知佢淨係話樽仔得凍同埋冇得走甜嘅,因為一早已經加咗糖落去咁話喎。雖然最後佢都冇話我知點解要用樽仔裝住,不過經過小編嘅明查暗訪下得知原來係因為好耐以前冇紙杯,電車司機好鍾意攞啲樽仔去買外賣奶茶,久而久之就成為咗呢度嘅一個特色喇。

呢支樽仔奶茶(HKD16)都唔係淨係得個樣㗎,奶同茶嘅比例控制得啱啱好,飲落又香又滑,係茶味有少少略嫌不足咁。

除咗馳名樽仔奶茶之外,西多士(HKD25)亦非常出名!小編聽朋友講,星期六、日嚟叫西多要等好耐㗎,事關個個嚟到都起碼會嗌一份。咁小編梗係要試吓呢份咁巴閉嘅「神級西多」啦!同我哋平時認知嘅西多有啲唔同,有啲似法式吐司嘅造法,麵包沾滿蛋漿再落鑊煎,好香口。夾層冇花生醬,取而代之嘅係落重手嘅牛油同埋淋面嘅煉奶。睇落好似有啲漏,不過食咗第一啖之後就停唔到喇,煉奶同牛油完美咁同西多融為一體,超match!

另外蛋牛包(HKD16)亦係好多地膽推介嘅必食之選,入面係煎蛋碎牛,仲有少少蔥花咁。麵包微微烘過,外脆內軟!唔好睇佢好似薄切切咁,咬落都好juicy㗎!16蚊大大個包,小編覺得性價比幾高喇!

 

街霸最愛:哎吔,今集好難揀得落手呀,事關蛋牛包同西多士小編都超鍾意呀!不過好似都係西多士略勝一籌,包住滿滿煉奶嘅多士食落口嘅感覺真係滿足到筆墨難以形容呀!超,正,呀!如果你未試就一定要試吓喇。溫馨提示,星期日係唔開嘅,唔好摸門釘呀!

瑞記咖啡奶茶
地址:上環皇后大道中345號上環市政大廈2樓熟食中心17號舖
電話:2850 8643
營業時間:星期一至六:07:30-17:00

You may also like...

Leave a Reply

Your email address will not be published. Required fields are marked *