【神枱級名店一定好食? 點評中環三大老字號】九記牛腩、蘭芳園、一樂燒鵝

中環有唔少老字號個名係好響,有啲仲係神枱級俾人讚到佢哋啲西多呀、麵呀、牛腩呀好食到天上有地下無咁!不過,好似係旅遊書介紹先講到咁好囉,現實係點?餓底們又未必咁睇喎!小編今次就試吓呢幾間所謂老字號名店係咪真係咁神啦,不出所料,期望愈大通常就……大家明啦!

九記牛腩出名嘅程度絕對係神枱級別喇,佢嘅裝潢仲好有港式老麵檔嘅味道,呢個相信亦係唔少遊客都慕名而來嘅原因之一。平日12點半開門,但係呢日小編12點鐘到,已經見到有人排緊隊喇,過咗15分鐘之後仲成條人龍添,好誇張呀!

嚟得九記點都要嗌返碗牛腩麵嘅,正如你去大X樂多數會食一哥焗豬一樣,梗係食佢最耍家嗰樣嘢啦!咖喱牛筋腩伊麵(HKD55),睇落去幾細碗吓,湯底呈啡紅色,浮晒啲油上面,感覺有少少唔開胃。雖然牛腩真係炆得幾腍嘅,不過碗嘢真係有啲太油、同埋分量太少喇,男士們食一碗應該係完全唔夠飽。

另外仲試埋呢個上湯牛腩河粉(HKD50),呢碗個湯頭幾好,味道適中,而且冇嗰種飲完味精湯會口渴嘅感覺。不過呢碗嘢同頭先嗰碗麵一樣咁細碗。兩者比較嘅話呢,小編就比較鍾意呢碗上湯牛腩河喇,原汁原味啲。總括嚟講,味道唔算差,又未至於會念念不忘又或者難食到想嘔,不過分量同埋等候嘅時間確實唔值$50一碗,重點係如果再遲啲嚟,最出名嘅牛腩有機會賣晒,如果你排完一大輪先知賣晒嘅話,真係嘥時間喇!

九記牛腩
地址:中環歌賦街21號地舖
電話:2850 5967
營業時間:星期一至六:12:30 – 22:30

蘭芳園亦係被大眾熱捧上天嘅小店之一,的確門口已經可以feel到一陣懷舊嘅港式風味,食正懷舊gimmick。呢間「鐵皮屋」夠晒特色呀!

一場嚟到點都要試吓最出名嘅豬扒包(HKD28)同埋西多士(HKD28)啦,睇落個豬扒包有少少單薄咁樣,成個包望落扁塌塌,唔多吸引喎!Size仲要勁細,仲細過小編隻手掌呀!不過「包不可以貌相」,可能食落會有驚喜呢?一啖咬落去之後,小編真係好想唱一句「我的天空今天有點灰!」。佢個麵包皮好硬,連塊肉都係偏硬,仲乾爭爭添呀!明明網上大受好評㗎喎……點解會咁㗎……

至於西多士呢,起碼賣相唔錯,唔會炸到一嚿粉咁。加埋糖漿同牛油就fit喇,都炸得幾好嘅,幾crispy,係好正宗地道嘅西多士,完。

至於呢杯跟餐嘅熱奶茶(HKD4),真係令小編有啲詞窮喇,即係咁,佢擁有一杯奶茶應該有嘅嘢-奶同茶。但啲奶冇特別滑呀,個茶底又冇特別香,好普通嘅熱奶茶。不過如果大家閒日經過嘅話都不妨入去食個西多,畢竟呢啲老店喺香港都愈來愈少喇!

蘭芳園
地址:中環結志街2號
電話:2544 3895/2854 0731

營業時間:星期一至六:07:00 – 18:00 (星期日休息)

 

最後一站嚟到呢間連續幾年獲米芝蓮車胎人推介嘅一樂燒鵝,小編睇到網友對呢間一樂嘅評價十分兩極,所以專誠去試吓喇!

馳名燒鵝瀨粉盛惠HKD56,抵唔抵就真係見仁見智喇。其實食落都ok嘅,肉質唔會太老或太嚡,不過就比較細件啲,瀨粉嘅分量亦唔多;另外伙記們嘅態度就真係……有待改進喇!所以總括嚟講,小編係覺得唔太抵食嘅,不過如果真係好想試吓米芝蓮推介嘅燒味都可以試吓嘅!

一樂燒鵝
地址:中環士丹利街34-38號地舖
電話:2524 3882
營業時間:星期一至六:10:00-21:00;星期日及公眾假期:10:00-17:30

 

小編真心覺得以上呢三間舖頭都係名過於實嘅,不過佢哋至今仍然保留咗獨特嘅港式情懷同風味係無可否認。所以小編認為如果你想食佢哋個環境、打個卡,叫做食過吓神枱級名物係可以一戰嘅,但真心唔好抱太大期望喇!

 

You may also like...

Leave a Reply

Your email address will not be published. Required fields are marked *