【買半斤燒腩仔少咗2兩 燒味店疑似呃秤仲發惡】食焦

俾人呃秤仲要受氣,係咪嬲先?好多時買燒味海味,俾足秤你係合理、唔足秤都成日聽聞喇,但去買嘢唔通真係要帶埋個磅出街咩!不過連肉眼睇得到都覺得少嘅,就真係呃秤喎!好似有網友喺馬鞍山石門一間燒味店度,買咗半斤燒腩仔,就咁睇都覺得少喎,咁就返屋企搵個磅磅吓,點知真係少得可憐!

應該當場叫佢磅多次,大家睇清睇楚最啱喇!(馬鞍山之友群組截圖)

有盒係咁!(馬鞍山之友群組圖片)

淨肉係咁!(馬鞍山之友群組圖片)

事主喺馬鞍山之友群組度話,「真心嬲……我拎左外賣望左一眼,都覺得有啲少……反(返)到屋企秤,連盒秤得263g,淨重得236g咋!半斤應該有302.4g囉!」事主仲細心到po埋張重量單位換算表出嚟,即係少咗成66.4g,計返斬少咗差唔多成2兩肉喎!

半斤八兩歌都有得唱,即係幾多gram?真係要睇換算表先知喇!(馬鞍山之友群組圖片)

係咪好多人瀨過嘢呢?(馬鞍山之友群組截圖)

都係嗰句啦,過咗海就神仙,除非當場斷正話佢呃秤又或者真係帶埋個磅出街啫!所以,事主都識趣,只係諗住打返個電話落舖頭,問吓佢係咪俾錯咗例牌嘅,結果「求其答『我地跟中國秤』…… 跟住佢一句 『係咁啦!』cut左我媽線!」事主梗係嬲爆啦,講明冇下次,幾好食都假!

大大隻字「半世紀的堅持」係門面㗎喎!其實堅持啲咩呢?(沙田一 至尊燒鵝·生滾粥品專門店fb專頁圖片)

一講大陸秤就好踴躍發言喇!(馬鞍山之友群組截圖)

呢間疑似呃秤嘅燒味店就係石門新開嘅「沙田一」,呢間自稱係至尊燒鵝同生滾粥品嘅專門店,賣點係現燒現賣古井燒鵝喎!據事主話佢lunch time嗰陣買咗盒燒腩仔飯覺得好食,於是夜晚諗住再外賣加料,結果變咗俾人減料!其他網友就叫事主報海關啦,又話呢間嘢嘅燒鵝皮又硬又唔好食,最重要係服務態度差!呢個先係最接受唔到囉!

口碑似乎唔多好喎…… (馬鞍山之友群組截圖)

自稱至尊燒鵝嘅燒鵝,得到冇味皮又硬嘅評語!(馬鞍山之友群組截圖)

You may also like...

Leave a Reply

Your email address will not be published. Required fields are marked *