【素蛋糕三大精選推介 無蛋奶素都咁香滑好味】素學堂

素食唔係得正餐先有,甜品選擇都有唔少,其實有好多地方都有素蛋糕㗎!今次我哋揀咗3間做精美素Cake嘅餐廳,全部都係無蛋奶素,有啲仲係無麩質添,健康指數唔係一般蛋糕可以媲美!部分蛋糕仲可以訂造,以後有素食朋友生日就唔使頭痕啦!

 

氣派之選  LN Fortunate Coffee

位於西營盤嘅LN Fortunate Coffee係一間專售賣素食食品嘅cafe,除咗正餐仲有多款西式小食同素食甜品,最驚喜係可以因應客人要求訂造純素/無麩質/無蛋奶素嘅蛋糕呀!

呢度有原個素食蛋糕可以訂,幸福冷泡咖啡朱古力蛋糕(HKD588/8吋)味道主要嚟自自家品牌嘅冷壓咖啡。蛋糕用亞麻籽、椰子油同腰果等製成,比一般蛋糕重身。面頭放咗大量唔同種類嘅果仁同生果做裝飾,口感非常豐富。

龍舌蘭腰果凍餅(HKD398/6吋)仲有唔同款,唔同size嘅蛋糕㗎。

當然仲有切餅件裝蛋糕啦,仲係每日唔同款式添。今次我哋試到兩款都用素忌廉同荳奶製成嘅抹茶芒果切餅[左]同朱古力香蕉切餅[右](HKD58/件)。抹茶好多時都係配紅豆,呢度就夾新鮮芒果,感覺更加清新。朱古力就用咗素可可粉製成,唔會太甜,甜味主要嚟自香蕉,都幾香㗎。

仲有好多款素食Cupcake(HKD36/件),呢幾款Cupcake 都冇用雞蛋,所以店舖都叫佢做素糕而唔係蛋糕。素糕比一般蛋糕厚實,由亞麻籽、椰子油、果仁等等製成,口感濕潤,而且會食得出一陣椰子香味。師傅都好有心思,好似朱古力素糕面頭舖咗杏仁醬加腰果打成嘅醬,扮成榛子忌廉芝士。呢幾款Cupcake冇平日食完甜品嗰種肥膩感,但就相當飽肚!因為用嘅材料比較厚實,最好係唔落化學食材。

另外吸睛嘅係素果撻(HKD58)呀!唔同嘅時令鮮果令到果撻七彩繽紛,最驚喜係撻底冇牛油成份,改用椰子油製成,椰香味好濃郁!

 

LN Fortunate Coffee
地址:西營盤第二街118號懿山地舖
電話:2858 3898
營業時間:星期一至日:09:00-22:00

 

悠閒小店  Sweetpea Cafe

喺中環嘅Sweetpea Cafe全間餐廳都係售賣無麩質食物,除咗甜品蛋糕,仲有一系列嘅三文治同意粉供應。遲啲佢哋將會喺佐敦開分店添,九龍區素友好方便喇!

Double Chocolate Vegan Cake (refined sugar free)(HKD$95/件)呢款雙重朱古力純素蛋糕係「三冇」蛋糕:冇麩質、冇人造糖、冇蛋奶素,仲可以訂造唔同size嘅原個蛋糕。用料十足,比普通嘅蛋糕更重身,但口感唔會好厚實,但就濕潤啲。主要用椰子油、椰糖同有機可可粉製成。可可味超濃,但甜度啱啱好,唔好甜食嘅朋友都可以一試。

右邊Peanut butter vegan cookies (nut free)(HKD75/件)雖然話係花生醬曲奇,其實不含任何花生元素同不含果仁,反而用咗豆類去扮花生醬嘅味,仲落咗椰子油,令曲奇透著一陣椰香味。質地鬆脆,切落去比較容易散,有少少似麥維他消化餅嘅口感。左邊Double Chocolate vegan cookies(HKD75/件)嘅朱古力味好重,feel到用咗大量天然可可粉,面頭再落埋素朱古力粒,一樣可以俘虜朱古力迷!缺點係素曲奇冇咗牛油香囉,不過口感冇咁肥膩。

Super foods latte with cashew nut milk(HKD75)係冇咖啡因嘅飲品,仲要唔係用坊間買到嘅素奶,而係餐廳自己製成嘅腰果奶,非常用心製作!味道會淡啲,不過飲到少少腰果味;而粉紅色係因為落咗天然食材打出嚟嘅粉,好健康㗎。

 

Sweetpea Cafe
地址:中環善慶街4號地舖
電話:3689 7269
營業時間:星期一至日:10:00-21:00

 

親民價素快餐  Loving Hut 愛家

Loving Hut愛家有唔同分店,我哋去咗九龍灣分店。佢係素食界嘅快餐代表,首先當然要價錢親民啦,都有熱食正餐供應;而一系列冇蛋奶素嘅甜品蛋糕都只係介乎HKD15-HKD33。

朱古力布朗尼(HKD33)蛋糕質感厚實,味道唔算好甜,有一陣黑朱古力嘅濃厚味道!餡料有好多合桃,幾足料又增加口感。加埋面頭塗咗層朱古力醬,感覺比平時嘅朱古力蛋糕味道更加濃喎。

小編幾鍾意烘烤過嘅杏仁片,好香口。而且呢款布朗尼冷熱兩食都得!焗返熱就似心太軟咁軟熟濕潤,凍食就似莎莉蛋糕。

草莓經典派(HKD27)底層係鬆軟濕潤嘅海綿蛋糕,有少少杏仁味。中間夾咗層士多啤梨果醬,唔會太甜。面頭嘅金寶脆脆奶酥好鬆脆,令味道同口感層次進一步提升呀!雖然佢係批,不過批邊唔係香脆口感,比較似海綿蛋糕面頭嗰層烘到深啡嘅皮咁,都幾香口。

藍莓芝士派(HKD25)食落口冇平時嗰種肥膩感,而且冇落蛋,冇咁結實易啲切開,質感似軟芝士蛋糕。口感幾香滑,芝士味都重。甜味主要嚟自藍莓果醬,一個人食晒都唔覺滯。

 

Loving Hut 愛家
地址:九龍灣牛頭角道77號淘大商場二期地下G242-245號舖
電話:2751 1321
營業時間:星期一、二及星期三至日及公眾假期:11:30-22:30

You may also like...

Leave a Reply

Your email address will not be published. Required fields are marked *