【整衰咗補鑊衰多次 網購翻糖蛋糕一肚氣】食焦

買蛋糕同人賀壽本來係開心事,但結果搞到又嘥錢又要嬲!呢次唔係收到個「生日快乐」殘體字祝賀牌喇,係訂咗個完全貨不對辦嘅蛋糕,仲要係好核突吓!有事主喺網上大控訴,叫人「大家小心,唔好訂呢間既(嘅)蛋糕」!然後po齊有相有字嘅對話出嚟,真係睇見蛋糕個製成品都冇晒胃口呀!

呢張係原圖!事主開開心心諗住俾人整返呢個蛋糕出嚟嘅,點知整到唔係嗰回事!(二手市場淘寶站群組圖片)

事主雖然話唔使加公仔啫,都唔係成個變到咁吓嘛?(二手市場淘寶站群組圖片)

係咁嘅,事主喺間蛋糕網店訂造蛋糕,仲要兩個星期前俾咗原圖佢,講明公仔唔使加㗎喇,但出到嚟嘅翻糖蛋糕係變咗泥膠公仔咁,完全唔似樣,仲要收成760蚊添!事主梗係即刻投訴pm佢啦,結果店主就話係個朋友整嘅,佢自己睇見都O哂嘴喎,又話點都會補鑊整返個新嘅蛋糕俾事主!

補鑊蛋糕原圖係呢個!(二手市場淘寶站群組圖片)

製成品係咁樣喎!(二手市場淘寶站群組圖片)

據說第一個原圖側邊嘅係南瓜車嚟嘅,但整咗個似壽包嘅物體出嚟!(二手市場淘寶站群組截圖)

嗰支嘢真係唔知想點?(二手市場淘寶站群組截圖)

好,事主再send多咗張圖俾店主,講一大輪總之係話一定整到啦,電光火石間已經即刻報咗價,又話做漸變色要加錢乜乜乜,最後係$420,唔計嗰$760,即係俾返$340事主,一聽個價,事主就話不如hold一hold,但係店主秒回佢話已經焗緊喇,咁即係焗要啦!結果,補鑊呢個所謂蛋糕都係慘不忍睹囉!

收七百六呢件嘢係人都嬲!(二手市場淘寶站群組截圖)

秒回焗緊,好快手!(二手市場淘寶站群組截圖)

事主仲話食食吓食到塊牛油紙添,不過店主就強烈否認有牛油紙!(二手市場淘寶站群組圖片)

重點係,又有網友說出重點來,「有無可能由預備焗蛋糕材料去到完成一個蛋糕一小時可以起貨?」仲有位自稱係做咗十幾年師傅嘅網友踢爆,話佢「根本係用後備蛋糕!」俾人連番追擊,其實店主都有還吓手嘅,喺ig度po咗段委屈文自己發洩吓,不過眼見個火愈燒愈大,最後fb專頁同ig都收咗檔!咁潛水避吓啱嘅!

強調一個鐘起貨嘅命苦蛋糕,店主自己喺ig發長文發洩!(二手市場淘寶站群組截圖)

本身呢間網店嘅出品,呢隻係?(二手市場淘寶站群組截圖)

老師傅都忍唔住喇!(二手市場淘寶站群組截圖)

ig公告收檔!不過可能心情太難過,寫錯咗係2017年喎!(二手市場淘寶站群組截圖)

You may also like...

Leave a Reply

Your email address will not be published. Required fields are marked *