【芒檸下午茶夏天最啱 $148歎盡新款鹹甜點】Essence

喺東涌行完outlet想唞返吓補充體力?近近哋去隔離諾富特東薈城酒店嘅Essence歎個週末下午茶自助餐啦,下星期會推出新嘅芒甜檸香「夏」下午茶自助餐,呢個天氣食夠晒爽呀!

Essence正正就喺酒店大堂,環境都幾開揚㗎!

芒甜檸香「夏」下午茶自助餐有大量用芒果同青檸整嘅精緻甜點同特色鹹點,清新又惹味咁衝擊味蕾呀!

香芒蝦沙律以芒果粒、爽口蝦仁同金柚絲做主料,再混入秘製泰式沙律汁同亁蔥碎,作為開胃菜真係好啱夏天食。

跟住梗係食啲香口嘢啦,脆炸魚柳佐芒果莎莎醬嘅魚柳輕輕調過味,脆漿都算薄;加埋用咗新鮮芒果蓉調製嘅芒果莎莎醬,酸酸甜甜感覺冇咁熱氣囉。

青檸忌廉小酥卷炸得金黃鬆化,裡面有滿滿又香滑嘅青檬芝士忌廉,食到淡淡嘅青檸同芝士香,邪惡但又唔想停口。

邪惡開就唔怕食埋美式青檸派啦,呢款起源於美國佛羅里達州嘅經典甜食,底層鋪滿青檸慕絲;面層空氣感嘅蛋白霜令口感更加豐富。

芒果粒粒雞蛋仔又係唔可以錯過,即做嘅脆皮雞蛋仔熱辣辣,加埋鮮忌廉同芒果肉又點會唔滿足呢?

自助餐仲有其他用芒果同青檸整嘅食物同其他菜色輪流供應,例如檸蜜豬頸肉、青檸迷迭香炸雞扒、青檸甜辣炸豆腐、脆辣香芒雞翼、青檸意大利芝士蛋糕、芒果葡撻、香芒椰子布甸等等。想book定位就去呢個連結啦:http://bit.ly/MangoLimeTeaBuffet

ESSENCE 芒甜檸香「夏」下午茶自助餐
供應日期:2018 年 6 月 2 日至 9月 2 日期間內,逢星期六、日及公眾假期供應
供應時間:14:45-17:00
星期六、日:HKD148/位,設加一收費
公眾假期:HKD168/位,設加一收費

 

Essence
地址:東涌文東路 51 號諾富特東薈城酒店大堂
電話:3602 8808
營業時間:星期一至日:06:00-23:00

您也許也會喜歡…

發表迴響

你的電子郵件位址並不會被公開。 必要欄位標記為 *