【樂富街市平價食好西 10蚊即開生蠔勁回味】街霸

九龍城有好嘢食就係人都知啦,其實喺附近嘅樂富區都有好多好嘢食㗎!除咗有一大個美食坊之外,街市入面一樣有驚喜㗎!今集街霸為大家介紹樂富街市好受街坊歡迎嘅兩間舖頭,就係一豚豬手同埋Oyster Station Snack & Oyster Bar!要食西餐?唔使去高級餐廳,街市都搞得掂喇,真係食好西呀呢次!

呢間一豚豬手位於街市入口位置,人流認真多呀!不過人來人往都阻擋唔到店員嘅熱情,小編停咗喺食物櫃前面考慮緊食咩嘅時候,店員已經不停推介佢哋最出名嘅豬手喇!

除咗招牌黑椒豬手(HKD58/細)之外,小編仲叫咗碟豬肋排(HKD35/細)。豬手同豬肋排係落單後即時切嘅,聽見店員同師傅講「攞嚿大嚿啲嘅!」,唔通驚小編唔夠食?哈哈!睇住師傅手起刀落,話咁快一盤豬手就落到小編手上喇!

其實仲有好多吸引嘅選擇㗎,例如滷水豬腳仔(HKD30/6件)醬汁焗雞脾(HKD30/2隻)麻辣雞翼(HKD30/8隻)等等,真係每日都可以加餸呀!

街市裡面多數都係外賣店,咁小編買完就當然要搵張櫈慢慢歎啦!(利申:小編都係第一次喺街邊食豬手同豬肋排……)

一打開個蓋就聞到陣煙燻嘅味道,我鍾意呀!份豬手大大盒,都幾重秤㗎!食落唔係平時屋企煮飯炆得好腍嗰種,完全係西式煮法,感覺用嚟送酒送白飯會好match!事關黑椒醃得豬手好入味,如果就咁齋食嘅話係會有啲啲鹹嘅。不過鹹豬手就係鹹㗎啦,好味咪得囉!你話係咪?

豬肋排係用蜜糖燒過嘅,好香好好味呀!以豬肋排嚟講都算多肉,唔會咬落去淨係得嚿骨咁,肉質都幾嫩,食完一條就想食第二條,停唔到口呀!

如果懶得煮飯又想平食好西嘅話呢(人總係咁大想頭㗎喇!),Oyster Station Snack & Oyster Bar呢度仲有得食10蚊隻優惠價嘅即開愛爾蘭生蠔,仲會送多2隻俾你,其中一隻仲係送正價嘅法國蠔添呀!所以小編叫咗6隻愛爾蘭蠔(HKD10/per),侍應再送多隻法國蠔(HKD原價58/per)同埋愛爾蘭蠔。依家60蚊食到8隻蠔,圍起上嚟7個半一隻咋!堅抵!

雖然唔使10蚊隻蠔,不過質素冇因為咁而下降。雖則話大隻呢,佢就真係唔算大隻,但就真係好夠海水味,同埋夠新鮮!其中有2-3隻係creamy嘅,其餘都以鮮甜為主。如果想平平哋食吓蠔又唔想喺屋企自己開嘅話,呢間的確係好唔錯嘅選擇。10蚊隻真係食返打幾兩打都唔算肉赤嘛!

 

街霸最愛:雖然豬手同埋豬肋排都好正,但以性價比嚟講10蚊即開生蠔毫無疑問喺呢集街霸脫穎而出,佢抵食嘅程度真係突破天際到會令我就算唔係住喺樂富會都專登走去幫襯。小編啱啱仲留意到原來喺其他地方有分店㗎,大家不妨去試吓!

一豚豬手
地址:樂富聯合道198號樂富廣場樂富街市405號舖
電話:2799 0799
營業時間:星期一至日:10:00-19:30

Oyster Station Snack & Oyster Bar
地址:樂富聯合道198號樂富廣場街市地下401-402號舖
電話:2549 0132 

營業時間:星期一至日:12:00-23:30

You may also like...

Leave a Reply

Your email address will not be published. Required fields are marked *