【老闆回流元朗開店尋根 秘製咖喱醬汁魚蛋】M8香港咖哩魚蛋專門店

元朗最近新開咗間M8香港咖哩魚蛋專門店,小編當時心諗:「咖喱魚蛋可以有幾專呀?」,於是懷著一個疑問嘅心情同朋友去試吓喇。

入到舖頭之後覺得環境比想像中乾淨企理,而且係比較新派嘅裝潢,同想像中賣車仔麵呀魚蛋嗰啲街舖嘅風格完全唔一樣。咁啱撞正老闆都喺度,一於問吓老闆有咩好推介啦。

老闆:「我哋呢度最耍家就係咖喱魚蛋(HKD12/6粒)喇,我哋個咖喱汁係自家調配嘅,用咗十幾廿樣香料調配而成,絕對冇味精㗎!」

同老闆傾咗幾句,覺得佢真係好nice呀!原來老闆之前喺外國做餐飲生意,中西餐都有涉獵,更係北京成都咖喱名店EGGO嘅主理人,老闆話有唔少明星都去過北京店捧場,「房祖名呀、阿嬌都間唔中嚟㗎,覺得最nice都係發哥(周潤發),佢咁紅都毫無架子,客人問佢介唔介意合照,佢係完全冇問題嘅!」

咖喱魚蛋呢啲咁平民咁貼地嘅小食,小編好奇點解老闆會用呢樣小食做招牌菜。「最簡單嘅先係最重要嘅,我喺外國返嚟之後,去過啲連鎖店呀、出面嗰啲小食店食嗰啲魚蛋,真係完全唔得,一嚿粉咁。」點解又要開喺元朗玩「隱世」呢?「因為自己本身係元朗原居民,都算係一種情意結啦,想返嚟自己成長嘅地方開店。」

小編事不宜遲試食吓係咪真係咁耍家先,爽口、彈牙不在話下,直頭食到魚味呀喂。我哋成日話魚蛋魚蛋,但都幾乎忘記魚蛋其中一個應該有嘅成份係魚呀。就好似墨魚丸你會expect佢有墨魚咁,魚蛋都應該要有魚肉喺裡面先算係一粒好嘅魚蛋㗎嘛!食魚要有魚味,食魚蛋都要有魚味呀!問到佢哋嘅魚蛋係咪自家製,老闆就話:「我哋都係搵廠訂嘅,不過就唔係香港嘅公司,而係一間新加坡嘅廠。大大話話都試嘅廿幾三十間廠先搵到真係滿意嘅魚蛋。」叫得做專門店,果然是專業的。

小編亦單點咗咖喱蘿蔔(HKD8)同埋咖喱豆腐(HKD9),去一間食店睇佢哋整食物嘅心機,最好就係搵啲要時間煮嘅菜式,咁就可以知道佢哋對食物嘅要求去到邊。今次蘿蔔上枱嗰陣色水唔錯,睇落似幾入味。食落口果然冇令我失望,咖喱汁完全同蘿蔔融為咗一體,超match呀!

跟住試埋個豆腐,其實食豆腐最怕就係佢只得個表皮有汁,裡面淡茂茂咁。小編咬咗第一啖之後發生咗一件小悲劇,就係我件白tee冇啦!我真係估唔到佢會爆,汁。仲要真係爆嗰隻,超級入味,超好食!呢個豆腐我俾滿分呀!

重頭戲嚟喇,雖然舖頭叫咖喱魚蛋專門店,不過其實都賣車仔麵(HKD42/三餸)嘅。湯底同醬汁選擇方面都可以見到老闆真係有心機㗎!醬汁分以揀咖喱汁或者五香汁,另外湯底就可以揀蝦膏湯或者大白菜清湯喇!今次小編就試咗佢哋嘅4餸咖喱撈麵,呢度嘅撈麵仲會送一碗大白菜湯解辣添,好貼心啊!個湯超鮮甜,老闆話係絕對冇味精嘅!「呢兩款湯都係細個我屋企成日都會飲嘅,希望大家可以食住魚蛋飲住湯咁感受到童年回憶同埋家嘅感覺。」

咖喱撈麵通常係啡黃色係咪?不過當小編撈勻佢嘅時候,撈撈吓變咗紅色嘅?唔通有辣椒醬收埋咗喺碗底?原來老闆話鹼水麵嘅PH值同咖喱汁撞埋會產生「化學反應」,係會變成紅色㗎!哦,原来如此!不過話時話,個咖喱汁真係有啲辣,如果平時食開BB辣嘅朋友可能要準備定一大杯水喇!

食完麵飲完湯,最後有杯凍檸茶做終結,好圓滿呀!小編平時都算去得多小店,不過呢間就真係俾到surprise我喇!強烈建議大家得閒去試吓!

 

M8香港咖哩魚蛋專門店
地址:元朗教育路54-66號順發大樓地下F號舖
電話:2476 0923
營業時間:星期一至日:11:00-01:00

You may also like...

Leave a Reply

Your email address will not be published. Required fields are marked *