【半自助餐主菜唔俾打包 網民嬲豬拒再幫襯】食焦

食唔晒嘢都唔俾打包?話係餐廳規矩喎!有食客就覺得搞到自己變咗大嘥鬼,認為餐廳唔俾人打包唔合理,仲話以後唔會幫襯添!不過嗰份唔俾打包嘅食物,其實係餐廳半自助餐嘅主菜食物,其他網友就話餐廳咁做冇唔啱喎,惹嚟好大迴響!

食剩2件仔嘅pizza唔俾打包,搞到事主話自己做咗大嘥鬼!(樂活鰂魚涌群組圖片)

7歲仔仔食唔晒,估唔到爸爸幫手都搞唔掂喎,係咪沙律吧食得太飽先?(樂活鰂魚涌群組截圖)

就係最後嗰句問題,搞到好多網友回應!(樂活鰂魚涌群組截圖)

成件事係有食客同埋7歲仔仔去咗鯉景灣間Wildfire食晏,揀咗嗰日餐廳嘅半自助餐餐牌,沙律吧同甜品係自助任食,主菜就任揀一款啦!食客仔仔揀咗個兒童餐,有pizza又有嘢飲,咁主菜未嚟就去咗攞碟沙律仔,食客強調攞嘅分量真係好細碟㗎咋,點知主菜嚟到,個pizza好大件頭,最後食剩2件,想打包竟然侍應話唔得!

唔講唔知喎,原来Wildfire係美心集團嘅!(網上圖片)

原因係話公司規矩,「侍應竟然說午市期間,因為有自助salad bar的關係,所有食物不能讓客人帶走。我問餐廳的經理,這些食物反正是被倒進垃圾筒的,為什麼不能讓客人帶走以免浪費?她說雖然之前已經收到很多客人投訴,但這是公司定的規矩……」仲話客人落單嗰陣已經提醒咗係唔可以帶走食物嘅!

沙律吧任食,有時食凸咗真係搞到食唔到主菜喎!所以記住唔好眼闊肚窄喇!(Wildfire pizzabar & grill專頁圖片)

食客嬲豬將事件po咗上群組,臨尾仲問:「這樣的餐廳,我以後都不幫襯了!你呢?」點知其他網友嘅反應好激烈喎,話餐廳咁做係因為有好多人食semi-buffet都狂食沙律吧嘅嘢但就專登打包主菜,所以認為餐廳依家唔俾打包嘅做法好合理,加上又有事先講明,覺得食客唔應該咁樣po上網嚟公審間餐廳!

係咪真係好多人會咁?(樂活鰂魚涌群組截圖)

網友激烈回應事主!(樂活鰂魚涌群組截圖)

網友愈講愈激,事主都好有心情回應吓,仲列咗十點說明出嚟添,最後佢話「……其實,我的貼文只是希望喚起社會對「惜食」的關注,大家咁湧躍發言,無論閣下觀點如何,我都感到高興。多謝大家!」其實講到尾,餐廳有餐廳規距,食客有食客選擇,搞到變網上罵戰就無謂啦!

事主又列出十點說明,真係好長篇!(樂活鰂魚涌群組截圖)

重點係,規矩死嘅、人係生嘅!但係,似乎好多村民唔係咁諗!(樂活鰂魚涌群組截圖)

即係慳返啖氣好過!(樂活鰂魚涌群組截圖)

You may also like...

Leave a Reply

Your email address will not be published. Required fields are marked *