【父親節訂位食咩好?老中青三級制任你選】名館、FEATHER & BONE、FRITES BELGIUM ON TAP

父親節好快到喇,大家諗到同爸爸食啲咩未呢?今次小編搵咗3間唔同類型嘅餐廳俾大家選擇,有中菜、西餐肉食同啤酒飲,總有一樣啱老中青唔同年代爸爸心水嘅!

長輩級中菜  名館

名館係一間新派中菜館,不論裝修環境定係碗碟擺設,都睇得出玩味十足,一啲都唔似傳統中菜館,好有特色。  

宮廷點心盤(HKD188)造型係非常精緻,西式有得high tea,中式一樣都可以。點心盤入面有三款前菜,酸酸哋帶點微辣,非常開胃。食完前菜,就可以食埋個老鼠愛大米同天鵝酥,天鵝酥入面係滿滿嘅紫薯蓉,口感超正,綿密得嚟仲好甜。最後唔少得要食埋個甜品啦,有兩款味道選擇,呢個中式high tea夠晒特色!

厚切叉燒皇(HKD88),長輩級爸爸一定鍾意食燒味,叫呢道菜實冇死呀!重點係,超超超超好食!厚切不在話下,瘦肉同脂肪比例控制得啱啱好,就算有脂肪但一啲都唔會肥膩,反而仲好想食多兩嚿添!配埋個叉燒汁真係一流呀!

沸騰水煮滑魚片(HKD298)分量十足!就咁睇好似得魚肉,但其實入面仲有埋豬紅、午餐肉同薯粉等,好有內涵㗎。原来師傅仲專程返內地學廚,原汁原味咁將四川嘅水煮魚帶嚟香港,再改良成香港口味,唔會好辣但又食得好過癮。

和風櫻花蝦炒飯 (HKD118),最最最有驚喜就係呢個飯!加咗鰻魚汁去炒,再撈埋櫻花蝦,食到蝦嘅鹹香味,香脆可口,食多兩碗飯都仲得!

名館
地址:中環擺花街1-7號1號廣場1樓
電話:2180 0768
營業時間:星期一至日:11:30-23:00

大胃爸爸最愛   FEATHER & BONE

FEATHER & BONE為咗慶祝父親節,斧頭扒每公斤(HKD399)咋!由六月頭開始供應,絕對物超所值,大啖肉啱晒活力爸爸啦!

除咗斧頭扒,最近FEATHER & BONE仲出埋日間餐牌,好似Smoked Brisket(HKD140),牛腩軟腍入味,加上有煙燻過,味道更加突出。

Galician Octopus(HKD190)見到都胃口倍增!八爪魚超大隻,啖啖都係肉,超級肥美呢!

FEATHER & BONE
地址:西環西營盤德輔道西321號瑧璈地下1號舖
電話:3705 0280
營業時間:星期一至五:07:00-22:00;星期六至日:09:00-22:00

地址:中環結志街18號地下
電話:2325 8570
營業時間:星期一至日 08:00-21:00

地址:跑馬地黃泥涌道11號永勝大廈地下A及C舖
電話:2836 3789
營業時間:星期一至日 09:00-22:00

潮爸啤一啤  FRITES BELGIUM ON TAP

FRITES BELGIUM ON TAP的環境係仿照二十年代比利時傳統啤酒屋嘅裝修設計,俾人好relax嘅感覺。

依家只要喺父親節當日,即2018年6月17號全日,所有父親喺FRITES歡度父親節同時享用主菜一份,可以全日用Happy Hour價無限暢飲指定酒精飲品,爸爸們一定超開心啫!

香草燒羊架(HKD245)分量超多,一啲都冇羊羶味,而且非常多肉汁、鮮嫩又唔會鞋口,好好食呀!

招牌忌廉青口(HKD245)同樣大件頭,忌廉汁好香滑,配埋青口食好夾,加上青口粒粒都好飽滿,鮮味十足!

FRITES BELGIUM ON TAP
地址:銅鑼灣希雲街38號曦巒地下1號舖
電話:2142 5233
營業時間:星期一至日:11:45-00:00

You may also like...

Leave a Reply

Your email address will not be published. Required fields are marked *