【當街著住鞋踩蒜頭 粉麵店女員工好唔衛生】食焦

雖然好多時都話眼唔見為乾淨啫,但係如果斷正見到又點呢?好似呢幾日就有條片喺網上瘋傳,短短十幾秒見到個女人喺條街度,將面前擺咗喺地上面嘅成盤蒜頭,揀起手隨即放落地,然後用隻腳嚟踩甩蒜頭啲皮囉,仲要著住對鞋(唔著鞋就咁用對腳又接受到咩?),真係睇見都覺得核突呀!

預備揀返個蒜頭拎起手先!(PLAY HARD 玩硬群組影片截圖)

一腳踩落去喇!(PLAY HARD 玩硬群組影片截圖)

扁晒甩埋皮!(PLAY HARD 玩硬群組影片截圖)

俾人拍低咗腳剝蒜頭皮呢一幕,仲po埋上網寫埋「元朗興記粉麵… 員工用腳係地下踩蒜頭!!#核突到呢」!網友見到呢條片梗係唔開胃,仲話一定要報食環有晒証據唔可以放過佢啦,又話最離譜係可以咁明目張膽喺條街度咁樣做,完全唔怕俾人覺得唔衛生囉!

出事粉麵店,係元朗洪水橋嘅興記。(網上圖片)

咁唔衛生,唔開舖頭名唔得啦!(PLAY HARD 玩硬群組截圖)

的確條片見到嘅環境,似係就咁喺舖頭門口外面發生,咁都唔理衛生情況真係誇張咗啲啦,但有唔少網友就話呢啲食店一請咗大陸員工就唔慌會乾淨。雖然唔可以肯定呢位店員係咪內地人,但好多網友都入咗大陸數㗎喇,仲認定咗佢係新移民大媽咁話添!

最多網友嘅第一個反應就係報食環喇!(PLAY HARD 玩硬群組截圖)

除咗隻襪同你揈乾啲食物,難度高唔高?(PLAY HARD 玩硬群組截圖)

一面倒咁鬧係常識啦,不過有啲網友高人都俾咗啲好建議㗎,例如話「其實用膠袋成袋用槌揼,咪又快又乾淨!仲可以袋住d衣掉!」、「係你都唔好咁揚吖,大搖大擺喺門口踩。」、「踩都唔緊要,搵個麻包袋 / 麵包袋 / 米袋包住先踩丫~」!之後麵店老闆回應傳媒時都承認係有員工咁做,但就話個員工只係第一次用腳咁嚟剝蒜頭,仲話因為員工唔識揸刀喎!至於嗰堆用腳踩完嘅蒜頭,老闆就話已經將佢掉咗,唔想有客人食咗有事!老闆自己都認為今次員工係做錯咗,但佢就話唔會炒咗個員工!

大家又點睇?

惟有化核突為幽默,笑吓啦!(PLAY HARD 玩硬群組截圖)

蒜頭係假、隻腳係假、對鞋都係假嘅!咁就啱喇,係咪?(PLAY HARD 玩硬群組截圖)

You may also like...

Leave a Reply

Your email address will not be published. Required fields are marked *