【元朗韓食店列三不准 阿朱媽老闆霸氣得個樣】食焦

國有國法、家有家規,咁食店又如何?有時一樣規矩多多㗎!最近就有網民喺食在元朗群組度po咗張「三不准」嘅相,寫明不准玩電話、不准食剩同埋不准未齊人入座。原来係出自元朗一間韓食小店嘅告示!其實呢間韓食店一向規矩多多,「阿朱媽」老闆娘仲成日俾人話惡聲惡氣添,不過知佢性格嘅街坊都話,其實「阿朱媽」得個樣!

「可能係全元朗最有性格嘅食店」又未免誇咗啲喎!(食在元朗群組截圖)

所謂old news is so exciting,耐唔時有網友開心大發現呢間名叫韓之美食嘅霸氣規矩,呢次出帖,依然引嚟好大迴響!有人認為唔准未齊人入座好合理吖,唔俾食剩都啱喎,但講到話唔准玩電話咯喎,對依家個個都要相機食先嘅香港人,真係好難接受到喇!

開業八年嘅元朗韓食小店,由「阿朱媽」親手主理。(網上圖片)

「阿朱媽」老闆娘其實深得熟客仔歡心㗎!惡聲惡盛得個樣啫!(韓之美食fb專頁圖片)

不過咁,被樓主稱爲「可能係全元朗最有性格嘅食店」嘅呢間韓之美食,原来都有唔少粉絲㗎!有網友話「阿朱媽」呢啲規矩已經好多年,最主要係唔想食客浪費食物,同埋真係可以好好咁享受一餐韓食,唔好淨係掛住玩電話啫!仲搞笑咁話有時試過俾「阿朱媽」作狀咁樣一嘢打落嚟個頭度添!

外冷內熱,係咪即係要幫襯多幾次先friend到呢?(食在元朗群組截圖)

又係要熟客仔先知囉!(食在元朗群組截圖)

其實幾年前「阿朱媽」老闆娘已經因為呢條「三不准」喺網上爆紅,當時仲有傳媒去採訪過添!老闆娘話好多小朋友都已經冇嘢食,所以佢最唔主張食剩飯餸嘅,加上佢間舖啲韓食嘅分量唔算多,如果咁都要食剩就真係浪費食物咁話!睇嚟「阿朱媽」真係得個樣靠嚇,好似網友咁講係「唔識佢就嚇死、識佢就笑死!」

Old news is so exciting!幾年前「三不准」個告示係咁樣樣嘅!(食在元朗群組截圖)

有例外嘅!(食在元朗群組截圖)

食嘢還食嘢,唔好掛住玩個電話,其實啱嘅!至於打頭嗰吓,係做樣!通常熟咗先會咁啦!(食在元朗群組截圖)

規矩多多會唔會少咗客?唔敢講!但係有網友就發現食店嘅價錢係呢幾年間都加咗唔少喎,就喺「三不准」告示下面就見,炸醬麵要60蚊一碗囉!所以網友就話未必係規矩咁多搞到唔敢去,反而係個價錢囉!一日都係舖租累事呀!

60蚊碗炸醬麵確係貴喎!(食在元朗群組截圖)

You may also like...

Leave a Reply

Your email address will not be published. Required fields are marked *