【McCafé新出夏日特飲 蜜桃咖啡貴價兼難飲】伏務台

每年夏天M記都會例牌出吓啲期間限定嘅夏日特飲,不外乎菠蘿特飲呀、水蜜桃梳打呀、青蘋果乜乜乜咁,多數跟餐+6蚊/8蚊就有一杯。不過今年M記就搞搞新意思,整咗兩款McCafé限定嘅特飲,分別係蜜桃鮮奶咖啡(HKD32.5/L)同埋冰雪菠蘿桂花(HKD33.5/L)。小編一於試試佢係咪真係值30蚊啦!

小編記得當年McCafé啱啱開始興嘅時候,咖啡師多數真係啲好chok嘅男仔,比較少女仔做。不過今時唔同往日喇,呢個終身學習嘅時代,好多姨姨都成功做到咖啡師喇!一去到姨姨就sell我試新嘢,誠懇語氣成功令小編放下防備之心……

可能係新嘢嘅關係啦,咖啡姨姨們好似唔太熟手,睇住佢哋手足無措咁騰嚟騰去,我大概等咗10-15分鐘左右,終於等到呢兩杯嘢飲到手喇!

喂喂喂,幻想同現實好似差得有啲遠噃!點解杯蜜桃咖啡面頭啲桃咁樣樣㗎,睇見有少少唔開胃!

將杯嘢攪勻之後呢,唔知係咪因為佢面頭啲蜜桃果蓉溝咗落咖啡度,搞到杰咗咁……飲完第一啖覺得其實桃味同咖啡味真係唔係咁夾,兩個味好似分開咁,完全唔融洽;加埋飲咗每一啖都會啜到啲蜜桃果蓉,感覺怪異得嚟有啲核突。飲飲吓唔知係心理作用定咩,覺得個肚有啲攪攪吓添……

呢杯冰雪菠蘿桂花表面有幾嚿罐頭菠蘿嘅菠蘿,我點解知佢係罐頭?因為……我望住姨姨開罐望咗5分鐘……

其實飲落呢,除咗甜,都係甜。連平時菠蘿特飲嗰種假到喊嘅假膠菠蘿味都冇,桂花就更加唔使講啦!花就冇喇,「貴」就真係貴喇!完全唔知自己飲緊咩,仲以為係細個喺小食店飲嗰種幾蚊嘅沙冰仔。

小編伏氣:用呢個價錢飲到杯咁嘅嘢真係伏到爆囉!一杯就甜到癲又冇菠蘿味,一杯就飲完攪肚痛,想點呀?10蚊都嫌俾多……仲要30幾蚊,貴過老虎堂喎!老虎堂杯黑糖波霸都係30蚊咋!

入伏點:McDonald McCafé
入伏價:蜜桃鮮奶咖啡(HKD32.5/L)/冰雪菠蘿桂花(HKD33.5/L)

中伏by #肥仔文
美術by #車雲
攝影by #肥仔文

《伏務台》星期一伏務大眾,歡迎各界報料。

 

 

 

You may also like...

Leave a Reply

Your email address will not be published. Required fields are marked *