【上水石湖墟街市多名物 歎完菠蘿蛋食傳統唐餅】街霸

講起上水大家可能淨係會諗起水貨水貨同水貨……但其實上水都係吃貨嘅好地方喎!今集街霸就帶大家去到上水石湖墟街市食好西喇!

上水廣場嗰邊無論幾點都係人山人海,反而街市呢邊平日晏晝人流唔算多,去到搭電梯上2樓就到熟食市場喇!

同一般熟食市場一樣,呢度都係不設劃位嘅,即係可以叫呢邊一碗牛腩河,再搭另一邊嘅西多士咁,好freestyle呀!同場嘅餐廳大家都好熟絡,同街坊有講有笑,好有人情味呀!

嚟得石湖墟街市冇食過明記會俾人笑㗎,今日小編就叫咗佢哋最出名嘅菠蘿蛋(HKD15)喇!

 

唔好以為菠蘿蛋入面真係有菠蘿呀,其實菠蘿蛋係煎蛋包住菠蘿包,食落有少少似西多士嘅味道, 但就有菠蘿包嘅甜味,口感係幾過癮㗎!菠蘿包中間夾住其他餡就見得多,搵煎蛋包住真係少見喇!值得一試!

除咗菠蘿包之外,炸豬扒都好受歡迎!當日小編見到同枱嘅西裝友都係叫菠蘿蛋+炸豬扒通(HKD29/連餐飲),睇嚟真係必點配搭喎!塊炸豬扒唔會好厚炸粉,食落有油香唔會太膩,肉質夠腍,又係嗰句,最基本嘅食物先見到真章呀!

除咗石湖墟名物菠蘿蛋之外,其實仲有啲「隱世」舖頭㗎!呢間興發餅家就係其中一間喇,賣嘅係傳統唐餅,款式花多眼亂,好多都係見到覺得好特別,但又噏唔出名咁。小編淨係認得光酥餅咋……

除咗杏仁酥呀、芝麻餅咁,白方包(HKD7/5塊)原來都好受歡迎!依家去連鎖餅店買包要成10蚊袋包咁滯,所以呢度真係好抵。有街坊同小編講幾年前係10蚊有7個提子包添呀!簡直糧尾恩物呀!

問老闆娘覺得邊款唐餅最特別嘅時候,佢就話自己鍾意食摩囉酥(HKD7)喇!唔講唔知,唔同餅家嘅摩囉酥都有唔同餡料㗎!興發嘅摩囉酥用嘅就係老婆餅餡料,食落口係叉燒酥嘅皮,老婆餅嘅餡,都幾特別㗎!同埋摩囉酥細細粒食完都唔會好滯,最啱口痕食一粒喇!

 

小編細細個好鍾意食香蕉糕(HKD6),不過大個之後呢類舊式餅店愈嚟愈少,好耐冇食過喇!呢個香蕉糕係有紅豆餡喺入面,食落口軟腍又QQ,好有童年回憶!

 

街霸最愛:今集最深得街霸心嘅莫過於特別又出位嘅菠蘿蛋喇,煎蛋邊燶得嚟皮夠滑,裡面嘅菠蘿包夾心好軟熟,平價又特別嘅小食真係買少見少呀!大家得閒記得去試吓!

明記美食
地址:上水石湖墟市政大廈2樓10號舖
電話:2668 6646
營業時間:星期一至日:06:00-17:30

興發餅家
地址:上水石湖墟綜合大樓1樓s10號舖2670-1130
電話:2670 1130
營業時間:從缺

您也許也會喜歡…

發佈留言

發佈留言必須填寫的電子郵件地址不會公開。 必填欄位標示為 *