【連日互插 網友剝花生 虎蝦變海蝦羅生門奇案】食焦

又有海鮮偷龍轉鳳事件發生喇!今次更加曲折離奇,苦主同店主都企硬仲互相出招,搞到件事喺網上洗晒版愈嚟愈激,真係好睇過戲呀!有網友喺群組大投訴,話自己買咗虎蝦去食店加工,等咗成個鐘唔在講,上枱嗰碟仲要全部係海蝦仔!「我買二百幾蚊斤虎蝦俾佢蒸,佢竟然求其拎碟普通海蝦俾我……呢間黑店係大埔街市三樓熟食中心,大家千其唔好幫襯,極度無良商家」。

虎蝦變海蝦唔嬲就假!不過後來苦主先講返清楚,拎去加工嘅只係3隻虎蝦,雖然都係冇晒,不過唔係成碟起碼十幾隻嘅虎蝦失晒蹤囉!(巴打絲打 Facebook Club群組截圖)

開咗邊係咪會縮水縮成咁?據店主事後講返,隻虎蝦俾佢哋剝咗個頭先蒸嘅,仲話縮咗水特別唔同色嗰隻就係,吓?(巴打絲打 Facebook Club群組截圖)

有圖有真相,虎蝦成隻手掌咁大,上枱嗰碟又的確係細咗幾倍嘅海蝦仔!呢間喺大埔墟街市嘅新樂園即刻俾網友圍插啦,仲俾人數埋佢之前有疑似偷龍轉鳳嘅前科,3隻蟹俾佢蒸,出到嚟變咗3蟹4蓋,又係唔同晒樣!

有前科喎,似乎紀錄麻麻囉!(巴打絲打 Facebook Club群組截圖)

呢位網友就唔係逐單計喇,睇累積分,判食店唔合格呀!(巴打絲打 Facebook Club群組截圖)

繼續鬧哄哄,苦主同店主都有接受傳媒追問,搞返清楚嘅係,苦主原来只係俾咗3隻虎蝦啫,唔係成碟分量咁誇,食店最後係有賠返$390蚊虎蝦費,但冇退返百二蚊加工費;而店主兩姊弟就同傳媒呼晒冤添,話嗰日只係見到一隻虎蝦咁大把喎,仲話開咗邊嚟蒸係一定會縮水,又話可以同海鮮檔證明,苦主的確只係喺檔口買咗一隻虎蝦!店主仲話唔想俾人冤枉,已經去埋警署備案添!

法官大人,各打五十大板啦!(巴打絲打 Facebook Club群組截圖)

呢個live如果做得成,確係幾好嘅實測喎!(Tai Po大埔群組截圖)

跟住又再有疑似店主嘅人喺網上po文,長篇大論反擊,「我地都希望當時人會返黎當面對質。因為你一個動作。令到我公司及我本人受到好多不公平及無理嘅評擊!」潛水幾日嘅蝦主終於又開聲喇,「夾埋樓下魚檔造假,希望警方到街市調查」。大家都似咬住大家唔放咁款!兩方都企硬各有版本,呢單奇案睇嚟仲有大把花生剝喎!

一人一句,你話信邊個好喇?(Tai Po大埔群組截圖)

蝦主開口喇!(Tai Po大埔群組截圖)

您也許也會喜歡…

發佈留言

發佈留言必須填寫的電子郵件地址不會公開。 必填欄位標示為 *