【椰子雞湯米線瀨嘢 冇味餸菜配死甜湯底】伏務台

旺角嘅農米莊,聽個名就知佢玩農村菜,唔知大家係咪同小編一樣咁諗:應該係清甜健康為主。的確係咁,仲話自己係「一碗可以連湯都飲晒嘅米線」,但廚師似乎對烹調嘅方法唔係好理解,因為餸菜冇味,湯底都怪怪哋。有網民仲勁踩佢哋服務差,等小編直擊睇吓有幾差啦!

餐廳牆身貼咗菜式簡介,椰子雞湯米線就係好多人滿心歡喜咁試,然後敗走話伏爆。

坐低叫咗椰子雞湯米線(午市HKD46/正價HKD58),5分鐘左右就有得食,咁快手就知啲嘢煮定等執料上枱啦。時間就是金錢,明嘅!不過黑面服務員勁大力「嘭」一聲放低碗麵,慌死我唔知有得食咁囉。

唔望碗米線係聞到椰子香,但一望就內心大叫OMG!有篤椰絲?從來真材實料嘅椰子湯係唔需要椰絲,而有呢樣嘢十居其九都係伏(除咗甜品)……點都試湯先啦,入口感覺幾混濁,唔係清爽feel,椰子嘅甜味有加咗糖去營造嘅感覺,即係死甜;至於雞味,如果真係有都俾甜味蓋過晒,後尾有少少酸味滲出嚟。啲蔥仲乾乾哋,都唔望俾到蔥香我啦……睇埋配料:

雞件睇落幾嫩,分量都ok,皮算薄冇咩膏,但一咬,冇味嘅?小編唔係想講雞冇雞味,有嘅,但係冇調味呀!似白灼浸熟就算……肉質軟腍唔彈牙。

豆卜一粒開半,白灼冇喺湯拖水,因為一咬就有白灼嘅水滲出嚟,充滿油益味……
冬菇兩粒1蚊至5蚊左右嘅size,都係白灼,不過有菇本身嘅香,都可以。
雲耳4塊,白灼冇咩味。
支竹2片係日式支竹,煮得軟腍咗,小編都係覺得中式比較有咬口,當然都有白灼feel。
時菜2條,少少油,但算新鮮。
白灼唔係罪過,但係最後將食材放返落湯拖拖水,等啲味入返食材度都好正常啫,但當然要搞返好個湯底先啦。食咗咁多嘢都冇圖片中令人期待嘅椰子肉……咁個湯有幾真材實料呢?

 

小編伏氣:小編唔介意食得清淡,今次啲餸真係冇味,呢個接受唔到囉……而餐廳咁大口氣話「一碗可以連湯都飲晒嘅米線」,小編真係不敢恭維,因為一路食內心一路默念唔可以浪費先繼續食,但湯真係冇辦法飲晒喇。最後食剩啲,黑面服務員又出現嚟收嘢,但收咗先問我係咪食完唔要啫。冇人規定服務員要笑臉迎人,但基本嘅態度同程序都要有啩……

入伏點:農米莊
入伏價:HKD46

 

中伏by #為食加菲貓
美術by #車雲
攝影by #為食加菲貓

《伏務台》星期一伏務大眾,歡迎各界報料。

You may also like...

Leave a Reply

Your email address will not be published. Required fields are marked *