【瘋傳阿華田雞蛋湯食譜 網民實測老公讚好飲】食焦

喺屋企或者茶記飲返杯阿華田就試得多啫,阿華田都可以用嚟煲湯?唔係啩?就係囉!呢期就有個阿華田雞蛋湯嘅食譜喺網上瘋傳喇!有網友經過書局,見到本家庭湯水食譜,揭揭吓竟然見到有阿華田雞蛋湯,仲要係喺補血養顏篇入面添喎!po咗上網跟住瘋傳,最估唔到嘅係即刻有網友自告奮勇,乜都假、煮咗先講啦!

留意返,係歸納為補血養顏篇㗎!(PLAY HARD 玩硬fb群組截圖)

阿華田溝雞蛋,真係未飲就想嘔?(PLAY HARD 玩硬fb群組截圖)

網友應該會有好多自創材料系列會陸續出場喎!(PLAY HARD 玩硬fb群組截圖)

率先po呢個食譜上網嘅網友,寫埋「依家啲烹飪書,定係我太Out?就係後面嗰本『滋陰補血湯』」,呢個湯就係阿華田雞蛋湯喇,出埋食譜㗎!睇埋功效講啲乜,寫住「阿華田含麥精、牛奶、可可、葡萄糖、維他命及礦物質等,雞蛋含有豐富營養,配合而用,能助人體力充沛,並有養顏潤膚等作用。」

估計係睇完個po,見屋企又咁啱有呢三樣嘢,咁咪整吓囉!又唔係話難整!(PLAY HARD 玩硬fb群組圖片)

呢位人妻網友仲即刻拍埋片㗎!睇吓啲蛋花!(PLAY HARD 玩硬fb群組影片截圖)

似係唔講得笑咁喎!不過網友一般反應梗係覺得係地獄料理食譜啦,仲話咁都可以出書教人煲湯水有冇兒戲啲呀?正當一人一句嗰時,心口寫咗個勇字嘅網友原来已經即刻坐言起行啦,預備埋材料(其實得三樣啫!),即刻煲啦,仲拍埋片出嚟㗎,有片有真相,雞蛋湯出到嚟,其實係成碗蛋花湯咁,仲要係阿華田色嘅蛋花湯囉!

完成品加老公評語。(PLAY HARD 玩硬fb群組截圖)

大家想唔想睇完世界盃飲返碗呢?(PLAY HARD 玩硬fb群組截圖)

咁即係咩味呢?(PLAY HARD 玩硬fb群組截圖)

味道如何?女勇士整完呢碗嘢,係俾咗老公食嘅!試食報告係「好彩我先生掛住睇波冇睇到呢個食譜,佢話好好飲,問我用乜嘢整咁犀利,我話啱啱上網學識整」,竟然係好好飲喎!仲話阿華田同雞蛋撞埋一齊係冇阿華田味嘅!唔知係咪煮開上癮,定係俾老公讚好味又夠飽肚嘅關係啦,呢位人妻跟住再聽埋其他網友嘅意見,阿華田之後輪到好立克雞蛋湯,繼續俾老公試味!睇嚟咁煮法,可以自己出返本地獄湯水食譜喎!

網友神理解,係一個叫阿華嘅人整嘅田雞加蛋湯!(PLAY HARD 玩硬fb群組截圖)

阿華田加雞蛋又聽過未?(PLAY HARD 玩硬fb群組截圖)

人妻再接再厲,下一餐係好立克雞蛋湯!材料即刻又有喇!(PLAY HARD 玩硬fb群組截圖)

You may also like...

Leave a Reply

Your email address will not be published. Required fields are marked *