【41年海防道臨時街市將拆 超爽牛丸+咖央多咪走寶】街霸

尖沙咀咁多新mall又大型商場,要搵潮食大把選擇,但係想食得地踎風味一啲又點?其實有個成41年歷史嘅臨時街市呢!大家又知唔知有咩好食?今集街霸就帶大家嚟到呢個充滿港式風味嘅海防道臨時街市熟食市場,盡情享受吓老好香港味啦!

喺尖沙咀人來人往但好似冇咩人會留意或者入去呢個海防道臨時街市。要入熟食市場要經過一連串賣清真肉嘅檔口,店主全部都係南亞籍人士,好有異國feel!

唔講唔知呀,原來呢個熟食市場將會喺今年11月就會進行大翻新,到時成個海防道街市都會關閉,預計要大概一年後先重開,不過到時應該又會變咗另一種風味喇!街霸覺得呢種歷史味濃嘅熟食市場買少見少喇,大家有時間嘅話可以親身去感受吓呢個近半世紀街市,有種坐咗時光機,或者走咗入王家衛電影嘅感覺,幻想吓梁朝偉張同曼玉就坐正街霸隔離食牛丸河都唔驚訝呀!

德發牛丸同埋合香園檔口重疊喺一齊,大家可以坐喺一張枱叫晒兩邊嘅食物,不過錢就要分開俾喇。平日三、四點唔算好多人,店員姨姨同街霸閒談嘅時候話「呢度11月都要閂門啦,要翻新呀,一早就應該要啦,41年喇」、「一落雨就漏水,咁多年都冇維修過,都幾危險㗎其實」!抬頭望一望有啲破洞嘅鐵皮天花,殘舊但相當歷史性嘅環境,紀錄咗幾代尖沙咀嘅歷史。周圍開咗好多新嘅大型商場,十字街頭、華燈璀璨,只有呢度好似時間靜止咗咁,41年都維持原貌咁。

德發牛丸最出名嘅當然就係牛丸(HKD32)啦,另外牛雜米(HKD32)亦相當出名㗎!一碗淨牛丸有8粒,都幾多吓。咬落爽口彈牙,牛味十足;牛雜米湯底好夠味,好足料嘅牛腩湯底呀,牛肚牛腸都好入味,唔錯唔錯。

咖央多士(HKD12)奶茶紅豆冰(HKD26)係合香園嘅王牌,咖央多士咬落脆得嚟又好鬆軟,面頭嘅咖央醬睇落薄薄但分量其實同多士配得啱啱好。另外奶茶亦係出晒名嘅,絲襪奶茶呀,唔係度度搵到㗎喇!香滑得嚟茶味超足,有少少茶應有嘅澀味,配埋紅豆都好夾。姨姨話夏天好多人叫呢個奶茶紅豆冰,消暑嘛。畢竟呢度長年冇冷氣,夏天熱辣辣,大家都食到大汗疊細汗。「喺呢度夏天係熱啲囉,41年嚟都係咁,以前就多啲人嘅,近呢幾年愈嚟愈少人喇。」係嘅,隔離咁多大商場可以歎住冷氣食嘢,邊個肯大熱天時走入呢個大型鐵籠入面只係食件多士飲杯嘢吖!不過街霸就覺得,喺佢正式成為歷史之前,大家行開尖沙咀真係要入去食吓嘢,呢份真香港味道,過多幾年就完全消失㗎喇!

 

街霸最愛:牛丸同奶茶紅豆冰係今集嘅雙冠軍!牛丸爽口程度爆晒燈,忍唔住一粒接一粒咁食,正呀!另外奶茶紅豆冰就夾雜咗合香園嘅招牌奶茶同埋童年回憶紅豆冰,又係不能錯過呀!街霸覺得今集介紹嘅美食,配襯埋個環境簡直係一絕,食嘅每一啖都係歷史,飲嘅每一口都係香港嘅味道。成日話食環境,除咗食靚環境之外,歷史嘅味道,你試過未先?

德發牛丸
地址: 尖沙咀海防道390號熟食檔
電話:2376 1179
營業時間:星期一至二:09:00-20:00;星期四至日:09:00-20:00

合香園
地址:尖沙咀海防道390號熟食檔
電話:不詳
營業時間:不詳

You may also like...

Leave a Reply

Your email address will not be published. Required fields are marked *