【老虎堂跪低買一送一爆人潮 黑糖珍奶排隊攻港未驚過】食焦

呢個星期嘅熱話應該係台灣老虎堂嘅黑糖風暴喇,一向自稱係手炒黑糖更以黑糖波霸珍珠奶茶響朵嘅老虎堂,俾人爆咗黑糖有添加焦糖色素,仲要係機炒而唔係手炒添!新聞一出,老虎堂算反應好快,即刻出道歉聲明題為「對不起,我們太急了」,長篇解釋係機炒黑糖嘅原因,仲即時推出只限兩日嘅買一送一波霸厚鮮奶優惠!送完奶都未夠,最新消息係呢個星期日會搵嚟網紅辣妹坐鎮做一日店長添喎!

開業未夠一年嘅老虎堂,被爆出黑糖風暴,有錯梗要認!(老虎堂fb專頁截圖)

呢個危機處理算唔算轉危為機呢?(老虎堂fb專頁截圖)

呢位叫短今(Sammie)嘅性感網紅,係台灣職棒中信兄弟啦啦隊嘅大紅人,勁多男粉絲 !佢喺網上自爆星期日做一日店長,引來勁多人報名!(短今Sammie ig截圖)

鬧老虎堂黑心無良嘅當然有唔少,但鬧還鬧,更多人相信嘅事實係「台灣人就是愛排隊!」,結果一如所料,呢兩日去老虎當嘅人潮有增無減,甚至乎比平時出現嘅人龍更長,全台7間店門外大大條人龍,排足2粒鐘都冇所謂!喺老虎堂門外等候期間唔少人都打卡po面書,有人仲留言話「今天老虎堂Tigersugar買一送一……我很不爭氣的去排了……我以為下雨加上負面觀感人潮應該會很少……但是我錯……」

爆料源頭係呢位自稱前員工嘅女子,不過據老虎堂之後嘅說法,就話經過人事部嘅調查,證實係無呢位員工喎!咁呢位女士係邊位?(東森新聞電視畫面截圖)

期間限定得兩日買一送一,所以日又排!(網上圖片)

夜又排!(網上圖片)

落雨都照排隊仲排足兩個鐘都肯,最誇張係有人買N送N。「有人買N送N……我以為我買6送6夠無恥夠不要臉了……沒想到有人比我更誇張……」有人更加當朝聖心態咁留言!「朝聖。雖然爆料被參焦糖色素,就是想試試~~~」台灣係咁,老虎堂上個月先喺香港開咗海外首間分店,咁香港店嘅黑糖又點?小編問過港店經理,佢就話現階段一切都要等台灣店嘅回覆同消息,香港店無可奉告任何嘢!

買6送6!真係唔怕焦糖色素咩?(美食.玩樂.papago fb專頁截圖)

竟然當朝聖咁排,仲講明話要試試焦糖色素!(網上fb截圖)

不過唯一肯定嘅係香港就冇買一送一喇,而人龍都係一樣要排!呢次台灣老虎堂掀起嘅黑糖風暴,睇嚟冇乜打擊到呢啲過江龍手搖店登陸香港嘅決心喎,好似新鮮熱辣又有2間同樣係以黑糖珍奶出名嘅過江龍排隊嚟緊,就係来自新竹嘅幸福堂、同埋喺士林夜市起家嘅珍煮丹喇,兩間都揀喺銅鑼灣區開,珍煮丹直頭開喺另一間過江龍迷客夏隔離添!珍奶戰陸續有嚟,繼續排隊啦!

幸福堂暫定7月尾攻港!(幸福堂fb專頁圖片)

幸福堂台中逢甲店上星期先搵嚟台灣知名主持陳漢典做咗一日店長造勢!(陳漢典fb專頁圖片)

珍煮丹,又係黑糖賣點,又係好快開嚟香港,又係喺銅鑼灣!(網上圖片)

You may also like...

Leave a Reply

Your email address will not be published. Required fields are marked *