【拍片教9蚊人仔食海底撈 內地網紅被插後揭真相】食焦

食得鹹魚抵得渴,有時候做得網紅,一舉一動真係要小心啲㗎,稍為踩線分分鐘火燒連環船都似!好似最近有位內地網紅就衰咗,又要衝出嚟道歉喇!可能連佢本人都冇諗過會搞到咁大劑。呢位叫「superB太」嘅網紅,原先拍咗條片,教人去海底撈食平嘢!點平法?6個人用10蚊人仔去海底撈食個下午茶喎!

內地網紅superB太喺下午茶時段,叫齊公司總共6個同事,一齊出發去海底撈,挑戰10蚊人仔就可以食到甜品下午茶喎!係,去海底撈食甜品喎!(秒拍影片截圖)

去到叫咗一個10蚊人仔一人分量嘅調味料,有啲牛肉碎呀芫荽呀咁!(秒拍影片截圖)

叫多碗4蚊人仔白飯。(秒拍影片截圖)

條數係點計呢?網紅當日一行6人去到海底撈,點咗一個唔使錢嘅清水鍋、一碗4蚊人仔嘅白飯,之後再叫侍應俾5杯冰,然後佢哋就開始行動出去攞生果喇,攞完返嚟就用自己帶嚟嘅榨汁機榨汁,6杯鮮果汁就咁整好!白飯落清水鍋加啲牛肉碎就變咗鍋粥喇,有得食又有得飲,呢個下午茶埋單14蚊,學生證仲有6.9折添,即係9蚊人仔就搞掂!俾佢原先想用10蚊嘅挑戰仲平咗1蚊雞添呀!

自攜埋榨汁機添!(秒拍影片截圖)

出去攞生果返嚟即刻榨埋就變果汁飲啦!(秒拍影片截圖)

學生證有69折,埋單9蚊人仔搞掂!(秒拍影片截圖)

結果條片出咗之後一片罵聲,惹來唔少網民都鬧佢「丟臉」、「這樣低質素還好意思拍出來教人」……以為開開心心拍條平食海底撈嘅片,竟然咁樣收場!之後「superB太」都有再po文,仲自爆返當日嘅真相,佢話其實嗰日已經同店員講明咗佢哋會拍嘢,拍嘢以外佢哋有開多另一枱再叫嘢食嘅,仲出示埋另一張單係食咗差唔多二百蚊嘅單!不過臨尾佢都就寫話「不過你要罵就罵吧!」……似乎幾委屈咁款喎!

俾人圍插之後自爆,其實事先同海底撈店員溝通好晒,知道會咁樣拍條片,仲開咗另外一枱叫其他嘢食嘅!(superB太微博截圖)

騷埋2張單出來證明添!(superB太微博截圖)

自爆埋真相都係收唔到科,網友依然繼續追擊,咁呢位網紅惟有再跪低,拍條片正式道歉,話已經知錯知衰,仲叫人千祈唔好學佢咁去海底撈照佢咁食法喎,片尾仲有文字寫明「謝謝大家的監督 我們會改正錯誤吸取教訓 做更多更好更正能量的內容」咁下次諗嘢拍之前真係要諗清諗楚喇!

最終都係要正式拍條片道歉!(superB太微博截圖)

睇返啲內地網友點講…… (網上截圖)

You may also like...

Leave a Reply

Your email address will not be published. Required fields are marked *