【熱糖水一啲都唔熱 養生花系列淡而無味】伏務台

依家愈來愈多人注重養生,仲有唔少食店都會用養生嚟做賣點添,但小編見太子間227甜棧養生糖水俾網民話太清淡,清到冇味咁。既然有伏評,小編又係時候試吓佢咩料子啦。

養生花系列價錢同一般糖水差唔多,有豆腐花、仙草同芋圓等材料,係中式加台式嘅組合。

見佢自選4款配料都係HKD38唔算好貴,一於試呢個啦!話明要養生,小編梗係食熱嘅糖水啦,呢個組合有薑汁黑糖水、鴛鴦豆花、芋頭、綠茶凍、小丸子同手工芋圓地瓜圓。賣相正常,但提提大家,我叫熱糖水,但嚟到係凍糖水放暖咗咁款,一啲都唔熱,仲有少少微涼添……

薑汁黑糖水夠色水,但薑味唔濃郁,飲完都冇薑喉嘅感覺;至於甜度,如果10分滿分,佢會有3分嘅!芋圓同地瓜圓質地偏煙韌,小丸子都軟過佢,而芋頭同地瓜嘅清甜味真係要好嘥力好費神先品嚐到呀!

豆腐花係小編最期待嘅,口感都算滑,但冇豆香味真係扣晒分,即使黑豆花都同樣淡味,差啲以為佢俾錯淨白豆腐花我添。

綠茶凍比較意外,佢入口冇味,但一咬就湧出綠茶嘅苦味,嗰種苦唔係葉嘅甘味,係單純嘅苦,呢款絕對唔建議大家試。

 

小編伏氣:小編唔太鍾意甜食,但今次都覺得太淡味喇。總括嚟講,成碗糖水嘅有味指數以10分為滿分,佢都有4分,因為粒芋頭幫佢加返1分,如果唔係就得3分喇;而好似豆腐花同芋圓呢啲需要特別製作嘅就特別淡味,雖然話就係養生系列,唔應該食得太甜啫,但都要有味囉……加上重中之重係,叫得碗熱糖水真係要熱辣辣,唔係放暖佢囉。

入伏點:227甜棧
入伏價:HKD38

 

中伏by #為食加菲貓
美術by #車雲
攝影by #為食加菲貓

《伏務台》星期一伏務大眾,歡迎各界報料。

You may also like...

Leave a Reply

Your email address will not be published. Required fields are marked *