【不滿連環檢舉遭霸凌 程班長小店停業抗議】食焦

遊行抗議靜坐抗議就聽得多,搞到要停業抗議又發生咩事呢?喺荔枝角工廈嘅程班長台灣美食,一直以來都有口碑又夠人氣,7月12日忽然喺fb專頁度公告要自主性停業抗議,「這些自從開業以來就沒完沒了從暗地裡飛來的箭;告訴這些發射暗箭的人(一個、兩個、或幾個……隨便啦),都因你們讓我們越來越堅強!」停業期間只會喺下午時段有外賣便當服務!

門口都貼晒標語,抗議長期遭人惡整霸凌。(程班長台灣美食fb專頁截圖)

呢次自主性停業抗議,效用有幾大?(程班長台灣美食fb專頁截圖)

搞到要停業抗議,無非係因為開業5年來,程班長呢間小店不斷被惡整,近來情況仲似乎愈嚟愈嚴重添!據程班長所講,懷疑有人針對食店不斷向政府部門投訴,搞到食店成日俾人上門查巡。忍無可忍,唯有作出呢個抗議行動!程班長仲話「所有檢查、檢證、牌照我們通通有、也都通過檢核」!但只要一俾人投訴、又快速地有政府部門人員即刻跟進喎!

仲有中午便當賣。(程班長台灣美食fb專頁圖片)

有冬瓜茶可以自取,但無耐就有消防署職員三度到訪話阻礙通道!行動咁快?(程班長台灣美食fb專頁截圖)

惟有當俾自己休息吓啦!(程班長台灣美食fb專頁截圖)

停業呢個星期以來,有唔少人都趁午飯嗰時幫襯買返個便當,更多人就選擇留言支持嗌加油,程班長見到有窩心留言鼓勵,都會親自回覆多謝!其實回顧吓程班長呢位台灣人,帶住自家出品移居香港開店,近年的確有唔少荒謬情節發生過,最經典係有疑似打手寫食評話程班長嘅珍珠奶茶奶味差,其實程班長根本都冇賣過珍奶囉!

係咪玩嘢?(程班長台灣美食fb專頁截圖)

繼續有人追擊,程班長就話希望呢類抹黑快啲收手!(程班長台灣美食fb專頁截圖)

唔止打手追擊,仲試過有飲食KOL將佢同一樣係賣台菜嘅阿元來了相比,結果就捧阿元踩程班長,有說係因為程班長唔肯俾錢做廣告鱔稿而惹來追擊!心灰意冷仲俾人狂檢舉,不得不選擇停業抗議啦!唔好以為停業就停晒手腳喎,程班長依家忙緊為美食節籌備,佢仲話呢段期間唔會接受任何傳媒訪問,就係唔想令人誤會佢呢次抗議行動係變相為美食節宣傳!

有食客真係中午時份去捧吓場買返個便當。(程班長台灣美食fb專頁圖片)

好多人留言支持程班長決定。(程班長台灣美食fb專頁截圖)

程班長仲寫明「賺錢不是人生唯一的重點」、「開店做生意也要有尊嚴」、「營業額損失事小」、「社會正義需要大家一起維護」,更難得係停業期間員工會照樣有糧出,真係良心老闆呀!停工應會至到8月頭,希望到時重新開業之後一切順利啦!

停業期間,程班長專心為八月美食節做準備!(程班長台灣美食fb專頁圖片)

程班長呢5個hashtag會有幾多食店老闆有共鳴呢?(程班長台灣美食fb專頁截圖)

You may also like...

Leave a Reply

Your email address will not be published. Required fields are marked *