【90後回流咖啡師灣仔開店 自創Fusion澳洲菜估佢唔到】NINETYs

小編最近喺灣仔見到一間裝潢相當唔錯嘅餐廳,門口Logo個符號似係由「九」同「O」組成,英文寫住NINETYs喎,90後嘅意思?再上網一睇,發現呢間餐廳大獲好評,咁真係要去睇吓喇!原來90後嘅店主老闆兼咖啡師Bruno,曾經喺美國贏過拉花比賽亞軍,又喺悉尼同埋台灣開過店。今次決心返嚟香港創業,佢為咗迎合市場口味,除咗專注咖啡質素之外,主食Menu亦落足心思,配合澳洲菜嘅Fusion感 ,好多菜式都中西合壁,估佢唔到咁有驚喜呀!

店內燈光昏黃,令人有種放鬆感覺,平日下午日時段人流都算多,多數係一班女仔high tea吹吓水嘅feel,唔係速食型嘅「偽Café」,年輕侍應們落單上餐動作不慍不火,禮貌100分,成間餐廳氣氛好悠閒好舒服。

呢味鹹蛋黃醬虎蝦.班尼迪蛋多士(HKD178),小龍蝦加班尼迪蛋麵包,配搭好邪惡嘅Brunch呀!小龍蝦上鋪滿鹹蛋黃醬,冇錯呀,呢排乜都加鹹蛋黃,但小編又冇諗過咁西式嘅小龍蝦竟然同鹹蛋黃醬咁夾喎!鹹蛋黃味濃得嚟唔會蓋過小龍蝦嘅鮮味,夾得啱啱好。另外班尼迪蛋亦煮得剛剛好,一切開就流心,蛋汁流落麵包上索咗汁之後夾埋小龍蝦上嘅鹹蛋黃醬,好滿足嘅口感。麵包超鬆軟,中間仲有啲果仁粒,超有咬口。原來全店嘅麵包都係Handmade㗎,食落超級鬆軟,真係忍唔住買返袋做早餐呀!

另外紅菜頭醬西班牙黑毛豬.班尼迪蛋多士(HKD158)亦係NINETYs嘅招牌,就咁睇擺盤已覺得成件事好Artistic!紅菜頭醬上放咗幾塊可愛嘅葉仔同埋……蝴蝶花?原来每道菜都會有呢朵花仔,咁精緻真係食都食得開心啲呢!呢朵三色紫羅蘭,即係蝴蝶花係可食用花嚟,顏色越深味道越甜!大家下次去嘅時候要試吓喇!好,講完Decoration,係時候focus返個主菜-紅菜頭醬配西班牙黑毛豬+班尼迪蛋。小編知道紅菜頭係女士們熱捧為抗氧化嘅恩物,不過就唔太buy佢嗰陣獨特嘅草青味……今次見到呢個賣相咁好,即管再試吓!食落口完全冇平時食到嗰陣草青味,取而代之係淡淡嘅甜味,有少少似蘿蔔甜,又幾好食喎!夾埋班尼迪蛋同埋慢煮5小時嘅西班牙黑毛豬,好full呀!咬落爆汁嘅蛋配軟腍嘅黑毛豬,豬嘅油膩被紅菜頭汁同埋夾喺中間嘅羽衣甘藍中和咗,食肉獸都食得fresh!

新登場嘅Wagyu Wagyu意大利青瓜和牛臉頰漢堡(HKD178), Wagyu即係日本和牛,呢個Burger用嘅和牛部位係唔常用嘅牛臉頰,慢煮足12小時,食落有咬口得嚟唔會太韌!面頭嘅意大利青瓜,質地煮得軟腍配埋紅酒汁,真係幾特別!中間又有頭先已經出過兩次場嘅班尼迪蛋喇,睇見佢脹卜卜咁真係口水都流埋呀!呢個Burger完全滿足到嗰種大啖大啖食肉嘅舒暢感,正呀!

大家平時食就食得多Muffin,不過用嚟做甜品又食過未?英式鬆餅多士(HKD78),一大球雲呢拿雪糕上淋上Homemade嘅鮮橙果醬同埋桂花碎,夾埋煙韌嘅Muffin,9唔搭8得嚟食落口又夾喎!所以話煮嘢食都要啲創意同埋膽大心細嘅,將一啲望落好似唔關事嘅食材放埋一齊,製造視覺同味覺嘅反差感,令人耳目一新好有驚喜!

作為一間Café,咖啡梗係主角之一啦!不過好老實小編真係好少為咗一杯咖啡去拜訪一間餐廳嘅(買杯Starbucks hea時間嗰啲唔計呀!),但NINETYs嘅咖啡令小編非常surprise,雖然選擇唔多,只有Black同White,Black(HKD42)係齋啡,White(HKD42)係有加奶嘅,仲有Fruity同埋Choco揀!開頭小編冇咩期望,不過見到呢杯咖啡上枱嘅時候,隔離有一小碟貌似提子乾嘅物體,究竟咩嚟?侍應就話佢哋嘅咖啡係唔建議加砂糖嘅,而係飲一啖咖啡前食兩粒提子乾,話感覺會好match喎!小編即刻照做,嘩,提子乾嘅甜味同咖啡嘅苦澀味融合之後超級順口呀!呢杯咖啡值得一試!

最令人驚艷嘅永遠壓軸登場,小編係唔多like齋啡嘅,苦到落喉嚨再喺個胃澀返上嚟嗰種感覺,真係未夠人生歷練去感受佢嘅美好。但一場嚟到點都要試吓嘅,話晒店主都鑽研咗咖啡咁多年!呢個齋啡係夾埋杏仁一齊飲,第一啖飲入口竟然冇預期嘅苦澀味,反而有好fresh嘅咖啡味,好醒神吓喎!

無論菜式、甜品以至咖啡都令人咁surprise,值得再回頭呀!雖然價錢唔算超親民,但質素超晒班!大家不妨去chill吓喇!

NINETYs
地址:灣仔皇后大道東222號地下2號舖
電話:2369 0118
營業時間:星期一至日:08:00-22:00

You may also like...

Leave a Reply

Your email address will not be published. Required fields are marked *