【叫32杯外賣臨送到先叫停 政府合署員工玩殘小店】食焦

叫咗外賣再取消已經唔多好,仲要唔係自己打去交代,要人哋差唔多送到嗰陣先話唔要喎,麻煩到人之餘仲做埋大嘥鬼,玩食物呀!叫杯檸茶仔就話啫,叫咗成32杯嘢飲喎,條數點計?有網友喺盡在元朗專頁度出po,直指政府合署8樓嘅職員X先生,寫埋佢電話號碼出嚟(頭4個字啫),「多謝你柯打!你的一句要收工無人啦!浪費了小店32杯飲品!」。

嘥心機之餘仲要嘥埋食物,真係唔應該呀!(連登截圖)

如果途中唔打電話去,係咪去到政府合署現場先話唔要呢?(連登截圖)

係咁嘅,茶飲小店收到呢位政府合署8樓(估計係元朗政府合署8樓地政署啦)阿X先生嘅外賣電話,點咗32杯飲品,嗰陣係三點九(正確係15:41),32杯嘢飲入面有15杯係要攪拌機整嘅,「以最快速度4點7、8到(度)我已經出發去截的士!16:48的士在途中打俾佢,佢話要收工啦,冇人飲吾(唔)要啦!」

成張單睇晒,32杯嘢係咪真係要整足成個鐘咁耐?(連登截圖)

網友答咗,唔係檸茶奶茶喎,係32杯嘢!即係要咁耐啦!(連登截圖)

溝通好重要,最緊要大家講清楚呀!(連登截圖)

網友仲出示埋水蛇春咁長嘅單,32杯嘢飲俾人以趕收工為由忽然話唔要,除咗浪費咗32杯飲品之餘,亦令到小店冇咗呢張成七百幾蚊嘅外賣單囉!出咗po,其他網友嘅反應都好兩極,有人話要投訴嗰位政府合署職員,整好晒先嚟話唔要order都要佢俾返一半錢啦起碼;有人就話由落order時間直到送去要成個鐘梗係唔等啦,有冇講清楚要整幾耐、幾點先送到呢?重點係,政府員工真係好趕收工喎!

網友表示羨慕。(連登截圖)

網友提供好橋。(連登截圖)

網友示範理智。(連登截圖)

雖然呢個po好快已經刪咗,但已經俾唔少網友轉載到唔同群組喇,而出po嘅事主就答覆咗傳媒,話多謝大家關心,仲話公道自在人心,都係唔講咁多咁話喇!而有網友就憑杯認店,話認得出係元朗嘅鼎鼎茶喎,仲話平時真係得1、2個員工喺舖頭,要整32杯嘢飲真係需要時間,又話要去幫襯返支持吓喎!

眼利網友認得出係邊間茶飲店喎,仲話呢間小店嘅朱古力一向好飲添!(連登截圖)

飲一杯要排個幾鐘、32杯等一粒鐘,係咪都係揀要排老虎堂呀?(連登截圖)

You may also like...

Leave a Reply

Your email address will not be published. Required fields are marked *