【春風撞奶舖網評超極端 小編實測青蛙撞奶即伏】伏務台

黑糖珍珠鮮奶呢排喺香港hit到爆,咁啱元朗呢間春風撞奶舖喺網上都掀起咗一陣熱潮,好多人都去朝聖。賣相同老虎堂同出一轍係黑糖虎紋之外,連奶都係用明治奶,不過selling point就係「香港首間撞奶舖」,但係……小編認為黑糖珍奶本身就係撞奶啦,只係比較少用到「撞」呢個字去形容啫,咪又係溝埋一齊!好似係。

小編聽到唔少人大讚佢嘅黑糖味同奶味都好濃,珍珠又好有咬口咁!不過上網睇一睇……喂大佬,網上評價都好兩極喎,有啲話值得排、有啲就鬧到爆,咁信邊個好呀?負皮仲有成大半版添!咁充滿實驗精神嘅小編當然要親身去試吓伏定唔伏啦!

有gimmick嘅珍奶店新開張通常引來長龍,不過小編當日去到就比較冷清喎,平日下午時間完全唔使排隊。而且出嘢飲嘅速度真係快到一個點,小編買咗杯青蛙撞奶(HKD29),俾完錢啱啱收好個銀包就有嘢飲喇,睇嚟唔似網民講到咁慢吞吞喎!

好啦,攞上手都有啲重量嘅,係個杯肥肥矮矮望落好似好細杯咁,分量唔算呃秤嘅!賣相方面呢,可以歸類為可以打卡嘅黑糖珍奶,個紋都ok靚嘅,加埋有啲古風嘅字體同Logo,賣相算合格啦!輪到味道,店員並冇提示飲之前要將佢搖幾多吓或者攪幾多吓,不過以小編飲珍奶嘅豐富經驗,當然知道要先攪勻啦,因為黑糖珍珠放底,然後先撞啲奶入去嘅,如果唔攪匀就會飲到一大啖黑糖水㗎喇!

攪勻後杯嘢又未至於成杯白晒嘅,杯底嘅黑糖珍珠係有少少攪唔勻,攪極都係有啲「黑糖塊」黐住一嚿嚿咁。飲第一啖,我個眉頭忍唔住皺到夾死烏蠅咁滯,嘩,甜到牙都甩。嗰種甜同之前飲過嘅黑糖珍珠味係唔一樣嘅,與其話佢係黑糖珍珠,小編覺得佢更加似「焦糖珍珠」,事關無論味道同質感都同平時食焦糖布甸時個焦糖一模一樣!成杯珍奶都係甜到爆嘅焦糖味,奶味幾乎零,珍珠亦唔算好有咬口,黑糖漿同珍珠難捨難離,搞到珍珠都甜到嘔……今舖真係伏喇!

其實呢間春風撞奶舖係春風三月嘅姊妹店,小編之前幫襯過春風三月,覺得自製桂花珍珠呀、火龍果珍珠呀都幾好食。點知開多間姊妹店就搞成咁,俾唔少網民圍剿。希望之後可以控制吓珍奶個甜度同奶味啦,或者起碼俾人揀吓要幾甜嘛!

 

小編伏氣:本身小編算係好食得甜嘅人,不過對住春風撞奶舖呢杯青蛙撞奶真係要投降喇!見到收銀處貼咗「甜度固定」字樣,咁小編都明白嘅,因為老虎堂嗰啲黑糖珍奶都係冇得揀甜度嘅,因為珍珠同黑糖係溝埋一齊煮。不過固定還固定,固定到飲完隨時糖尿嘅甜度就唔好啦,依家健康新世代盡量少甜或走甜,反其道而行賣超甜珍奶……會唔會唔係咁啱個市場呢?

入伏點:春風撞奶舖
入伏價:青蛙撞奶(HKD29)

中伏by #肥仔文
美術by #車雲
攝影by #肥仔文

《伏務台》星期一伏務大眾,歡迎各界報料。

You may also like...

Leave a Reply

Your email address will not be published. Required fields are marked *