【新派米線湯底選擇多 三大必食特色新力軍】豪哥私房菜、雲南記 醋‧米線、米線陣

香港人好鍾意食米線,不過食來食去多數都係X仔呀、X桂香咁,啲餸多數都係車仔麵餸,有十幾款任你揀嗰隻,都係腩肉呀、豬腸呀、蘿蔔呀咁囉;湯底不外乎又係酸辣麻辣或者清湯咁。有冇啲新嘢食吓呀?有,呢期咁啱有啲新派米線登場喎,小編今次同大家介紹三間新派特色米線啦,無論湯底、米線抑或配菜都真係有啲新意㗎!

燉湯湯底夠養生  豪哥私房菜

豪哥私房菜雖然開喺元朗YOHO附近,講真就真係唔算就腳㗎喇, 不過一樣引來大班Fans喎,究竟有咩咁巴閉?原來呢間私房菜除咗有小菜,仲有幾款特色湯底嘅米線,相當吸引!

嘩嘩嘩,好大隻虎蝦喎!呢個濃湯鮮茄大虎蝦米線(HKD68)喺米線界嚟講可算足料,平時食米線可能會當「頹飯」咁食,點知呢間私房菜嘅米線咁揼本,足足有3隻大虎蝦喎!虎蝦鮮甜爽口,另外湯底就係老闆用鮮茄再加茄膏整嘅,比起只用茄汁調味更香濃,飲落更順口。

燉湯米線(HKD52連飲品)仲堅,老闆話真係用原個燉湯嚟做米線湯底㗎!湯飲落超清甜,好似飲緊阿媽煲嘅住家湯咁!米線冇平時食開嗰啲咁重口味,味道清甜,有種反樸歸真嘅感覺,好pure好true呀!小編冇諗過連米線嘅湯都可以成碗飲晒,爽呀!

紫菜湯牛肉餅米線(HKD49連飲品),望落去好似好簡單咁,其實呢個牛肉餅唔係度度食到㗎!因為老闆豪哥話牛肉餅係佢家鄉海豐嘅特色小色,佢話鄉下學校隔離成日都會有啲伯伯開啲車仔檔賣俾啲學生食,係一款充滿住家鄉味道嘅小食呀!小編真係未食過呢個味道嘅牛肉餅,咬落去感覺同牛丸唔一樣,比牛丸更彈牙同有咬口,加上牛味好濃,雖然唔係爆汁,但係味道好香,口感非常好。一碗有七、八粒,同埋鋪滿嘅紫菜,無添加任何味精,個湯又係可以飲埋!

酸菜湯馬膠丸米線(HKD52連飲品)同頭先個紫菜湯牛肉餅一樣,馬膠丸係老闆自己打嘅,食落有啲似魚蛋,好有魚味同埋好彈牙好有咬口,有少少似鯪魚滑嗰種「魚膠」質地,食到唔停口呀!呢碗米線望落去超足料,有海量嘅大豆芽、韭菜呀等等,湯底酸得嚟帶微辣,幾惹味!雖然比頭先3款米線重口味少少,但都唔會話食到好口渴咁,認真唔錯。

其實米線可以好簡單,但有心搞可以好多花款,好似豪哥就用健康煮法帶出家鄉味道,超有心思!豪哥話佢家鄉唔興酸辣嘢,不過就鍾意將唔同地方流行嘅口味mix & match,例如好似將汕尾嘅馬膠丸加入川式嘅酸辣湯米線當中,味道又好夾喎!除咗米線之外,平日晚市佢主力做海豐嘅家鄉私房菜,當中好多都係由傳統菜式改良而成,見豪哥不停諗新菜式,小編真係覺得好有heart!豪哥仲話由1月開業至今,已經開始儲到一班熟客仔,更加有食客為咗食佢嘅私房菜特登由港島、西貢搭車過嚟添!

豪哥私房菜
地址:元朗鳳攸南街3號好順景大廈29號地舖
電話:5282 4084
營業時間:星期一至日:11:00-00:00

無添加五色米線  雲南記 醋‧米線

第二間同大家介紹嘅就係雲南記 醋‧米線,全部米線都係自家製㗎!最招牌係五色米線喇,製作方法係將米打成米漿之後再加入各種蔬菜汁,例如紅菜頭、菠菜、紅蘿蔔、墨魚汁同埋最原始嘅純米米線。望落五顏六色,真係幾衝擊視覺㗎!老闆話佢同拍檔本身喺雲南工作咗好多年,返到嚟香港之後覺得香港流行嘅米線同雲南嘅傳統米線有啲唔一樣,所以就想為大家帶嚟一種雲南當地正宗嘅味道喇!

高原野生菌雲吞配紅菜頭米線(HKD46)望落顏色好似好假咁,但唔好誤會呀,呢隻紫紅色唔係色素嚟,而係紅菜頭嘅紅色呀!雖然食落紅菜頭味道就唔係話好出,最主要都係米漿嘅味道啦,不過食落覺得好fresh。小編平時較少食菜,食完呢碗紅菜頭米線,心理上覺得好似即刻補充咗啲纖維咁喎!

唔少米線店都會有大大碗嘅「過橋米線」俾大家選擇,呢度就有特色嘅福祿壽三寶米線(HKD88),分別有3款唔同口味嘅米線(款式由當日廚師決定),一次過食到三款口味嘅手工米線,唔錯喎!今日精選就係紅菜頭、菠菜同埋純米米線,另外餸亦有3款,分別係肥牛、豬膶同埋滷肉。滷肉醃得夠入味,豬膶唔腥口感滑嘟嘟,加埋少少辣肉碎同埋酸菜,完全滿足到米線控嘅口慾呀!

冬蔭功海鮮米線(HKD56),以為冬蔭功湯只會喺泰式料理店先食到?錯喇,作為一間突破傳統嘅米線店,梗係要善於將唔同地方嘅口味mix & match啦!酸酸辣辣嘅冬蔭功湯底同掛湯嘅米線真係幾夾喎,配料如豆卜呀、芽菜「索」晒湯汁,非常惹味!

呢家位於粉嶺嘅米線小店主打自家製五色米線,其實真係幾有heart,事關佢哋喺香港自設廠房整自家米線,保證無添加防腐劑同埋色素。老闆話現時香港絕大部份嘅米線店多數都係入江西嘅廠貨,自家嘢係零舍珍貴嘅!加上價錢又唔算貴喎,真係良心小店呀!

雲南記 醋‧米線
地址:粉嶺聯和墟聯興街11-15號地舖
電話:2386 8999
營業時間:星期一至日:11:00-22:00

創意fusion味  米線陣

最後一間係連鎖米線專門店-米線陣。唔好以為連鎖店就冇乜創意呀,作為一間專做米線起家嘅餐廳,佢哋定期會更新米線款式同湯底,唔會賣死一種好賣嘅米線㗎!

講起米線湯底呢,會有兩派人走出嚟-清魚湯同酸/麻辣湯。點知米線陣竟然整個北海道3.6牛乳湯底出嚟喎!北海道3.6牛乳南瓜雞髀肉竹笙米線(HKD46)感覺真係幾fusion,日式又中式。開頭expect會係一個有啲似台灣嗰種牛奶鍋嘅感覺,即係奶味唔會好濃,實情係呢個3.6牛乳南瓜湯個味好濃厚喎,唔會話水汪汪好稀咁!

另外麻辣蕃茄肥牛魚腐米線(HKD72)都相當刺激味蕾!蕃茄湯底成日食㗎喇,不過麻辣茄湯就比較少見喎!食落有少少似羅宋湯感覺,但又比羅宋湯更香辣可口。用咗新鮮熬製嘅清甜蕃茄湯,再配上等靚花椒、胡椒同辣椒乾等材料熬製而成嘅四川麻辣湯,加埋好掛湯嘅美國肥牛、魚腐同埋招牌米線,好惹味呀!

最後呢款鮮香椰子雞米線(HKD56)好受歡迎㗎,清甜椰子湯底由椰肉、椰蓉同埋椰青水熬製而成,每啖湯都充滿甜椰香!配料方面有嫩滑雞髀肉、雪耳、腐竹等,夾埋椰子湯咁fresh嘅湯底,夏天都唔會躁底啦!不過呢個椰子雞米線係期間限定,預計供應到8月中咋,大家想試吓就要快手喇!

米線陣(全線分店供應)
地址:銅鑼灣翡翠明珠廣場1樓5A及5C號舖
電話:2522 5299
營業時間:星期一至日:11:30-22:30

You may also like...

Leave a Reply

Your email address will not be published. Required fields are marked *